Uğurlu sahibkarlar nə edirlər və siz də bunu necə bacara bilərsiniz?

Bəzi insanlar uşaqlıqdan sahibkarlıq ruhuna malik olurlar. "IKEA" şirkətinin banisi İnqvar Kamprad Stokholmdan çox da uzaqda yerləşməyən ailə fermasında böyüyüb. O, şəhərə gedərək kibritləri qutu ilə alıb, daha sonra onları fermalarının ətrafındakı kənd sakinlərinə tək-tək satmaqla yaxşı qazanc əldə edə biləcəyini kəşf etmişdi. Sonradan kiçik biznesini genişləndirərək balıq, diyircəkli qələmlər, karandaşlar və digər məhsullar satmağa başladı.

Atası məktəbdə yüksək nəticələr göstərdiyinə görə ona pul mükafatı verdi. Kamprad həmin vəsaitdən istifadə edərək Stokholmda topdansatış qiymətinə aldığı kiçik mebelləri poçt sifarişi ilə satan biznes qurdu. Bu kiçik təşəbbüs sonradan qlobal şirkətə çevrildi.

Belə insanlardan uğurun əsas sirrini soruşsanız, onlar adətən "risk edin", "uğursuzluqdan qorxmayın" və buna bənzər tövsiyələr verəcəklər. Lakin bunlar hər zaman praktik baxımdan kifayət qədər faydalı olmur. Bacarıqların uzun siyahısını təqdim etmək əvəzinə, uğurlu sahibkarların etdiklərini sizə tətbiq etməyə kömək edəcək praktiki addımlara nəzər salaq:

1. Kiçik miqyasda sahibkar olun

Sizdə əlavə gəlir əldə etmək üçün istifadə edə biləcəyiniz hansı bacarıq və ya istedad var? Repetitorluq edə bilərsinizmi? Musiqi dərsləri keçə bilərsinizmi? Hər hansı məhsul hazırlayıb sata bilərsinizmi? İtləri gəzdirə bilərsinizmi?

Məhsul və ya xidmətinizi müəyyən etdikdən sonra plan hazırlamalısınız. Fəaliyyət göstərəcəyiniz ərazi haradır? Qiymətlər necə olacaq? Müştəriləri necə cəlb edəcəksiniz? Reklamı hansı üsullarla aparacaqsınız?

Bu suallar sizi araşdırma aparmağa vadar edəcək. Uğurlu sahibkarların hamısı biznesə başlamazdan əvvəl bazarı araşdırırlar.

Əsas fikir budur ki, həftəsonları idarə edəcəyiniz kiçik bir biznes belə qursanız, böyük sahibkarların etdiyi prosesi kiçik miqyasda təkrarlamış olacaqsınız. Bu zaman səhvlər də edəcəksiniz və bu, yaxşı haldır. Çünki hər səhv öyrənmək üçün fürsətdir. Beləliklə, seminar və ya kurslarda əldə edə bilməyəcəyiniz praktik təcrübə qazanacaqsınız.

2. Uğurlu sahibkarların hekayələrini oxuyun

Bu, hər axşam yatmazdan əvvəl oxuduğunuz materiallardan biri olsun. Onların biznes planı hazırlamaq, məqsədlər müəyyənləşdirmək, bazarı sınaqdan keçirmək, fəaliyyətə başlamaq, brendlərini tanıtmaq və müştərilərlə güclü münasibətlər qurmaq üçün hansı addımları atdıqlarını öyrənəcəksiniz.

3. Müəssisələrin sosial mediadan necə istifadə etdiyini araşdırın

Əgər "Facebook" istifadəçisisinizsə, həmin platformada marketinqin necə işlədiyini artıq müəyyən qədər müşahidə etmisiniz. Maraq göstərdiyiniz məhsullar xəbər lentinizin kənarında reklam kimi görünür, biznes səhifələrinin paylaşımları isə xəbər lentinizdə qarşınıza çıxır.

Bu necə baş verir?

Əgər onlayn fəaliyyət göstərəcək biznes qurmaq istəyirsinizsə, bu marketinq mexanizmini öyrənməlisiniz. Bunun üçün təkcə kitab oxumaq kifayət deyil. İnternet marketinqi üzrə seminar və ya təlimlərə qatılın, rəqəmsal marketinq haqqında bloqları izləyin. Beləliklə, bu işi özünüz görə biləcəyinizi, yoxsa mütəxəssisə həvalə etməli olduğunuzu müəyyən edə bilərsiniz.

4. Yerli biznes şəbəkələrinə qoşulun

Belə şəbəkələr demək olar ki, hər yerdə fəaliyyət göstərir. Onlara qoşulmaq sizi sahibkarlardan ibarət geniş bir mühitin bir hissəsinə çevirəcək.

Dinləyin, suallar verin və məsləhətlər alın. Bu insanlar artıq biznesə başlama mərhələsini keçiblər və indi inkişaf və genişlənmə üzərində çalışırlar. Onların təcrübəsi, etdikləri və etmədikləri işlər sizin üçün dəyərli olacaq.

Bundan əlavə, burada quracağınız əlaqələr gələcəkdə sizə yeni müştərilər qazandıra bilər.

Məsələn, repetitorluq biznesinə başlayırsınızsa, həmin qrupda valideynlər, əmilər, xalalar, dayılar, bibilər və nənə-babalar olacaq. Onların dostları və qonşuları da var. Tövsiyələr yeni müştərilər qazanmağın ən sürətli yollarından biridir.

5. Sahibkarların necə ünsiyyət qurduğunu öyrənin

Fəaliyyət sahənizdə və ya ona yaxın istiqamətdə çalışan şirkətlərin internet saytlarını araşdırın. Məzmun necə yazılıb? Bloqları varmı? Bloq yazılarını oxuyun.

Biznes və marketinq üçün yazı üslubu universitetdə öyrəndiyiniz akademik yazı üslubundan fərqlənir. Akademik yanaşma biznes dünyasında hər zaman effektiv olmur.

Buna görə də qeyri-rəsmi, səmimi, söhbət üslubuna yaxın və mümkün qədər maraqlı yazı tərzi formalaşdırmağa çalışın.

6. Sizə fərdi şəkildə dəstək verəcək təcrübəli sahibkar tapın

Əgər həqiqətən sahibkarlıq bacarıqlarınızı inkişaf etdirmək istəyirsinizsə, mentor ən yaxşı seçimlərdən biridir.

Belə bir təcrübəli sahibkar planlaşdırmadan biznesin açılışına qədər bütün mərhələlərdə sizə yol göstərə, məhz həyata keçirdiyiniz layihəyə uyğun tövsiyələr verə bilər.

Bu yolu artıq keçmiş bir insanın fərdi dəstəyi sahibkarlıq inkişafı üçün ən dəyərli resurslardan biri hesab olunur.

Tənzilə Ağabalayeva