Barbara Corcoranın pulunuzla etməməyi tövsiyə etdiyi 5 şey

"ABC" telekanalının "Shark Tank" verilişinin investoru Barbara Corcoran təkcə məşhur investor deyil, həm də Nyu-York şəhərinin ən böyük daşınmaz əmlak broker şirkətlərindən biri olan "Corcoran Group"un təsisçisidir.

O, ofisiant işlədiyi dövrdən ayrıldıqdan sonra götürdüyü 1 000 ABŞ dolları məbləğində kreditlə şirkətini qurub və 2001-ci ildə onu milyonlarla dollar qazandıran müqavilə çərçivəsində satıb.

Corcoran pulunu necə artırmağı və daha da vacibi, onu necə qorumağı çox yaxşı bilir. Əgər siz də onun kimi maliyyə azadlığına nail olmaq istəyirsinizsə, o, pulunuzla bağlı aşağıdakı beş vərdişdən imtina etməyi tövsiyə edir.

Birinci dərəcəli aviareys biletlərinə pul xərcləmək

Corcoran multimilyonçu olsa da, təyyarədə iqtisadi siniflə səyahət etməyə üstünlük verir.

"Mən təyyarədə biznes sinfi bileti almıram. Həmişə iqtisadi sinifdə uçuram", – o, "CNBC Make It"ə müsahibəsində bildirib.

Bunun əvəzinə o, iqtisadi sinifdə səyahəti daha rahat etmək üçün özü ilə keyfiyyətli yemək və ya kiçik şüşədə şərab aparır.

Əlbəttə, əgər biznes sinfini rahatlıqla ödəyə bilirsinizsə və ya sağlamlıq səbəbindən daha komfortlu oturacağa ehtiyacınız varsa, bu seçimdən istifadə edə bilərsiniz. Lakin yalnız başqalarını təsirləndirmək üçün minlərlə dollar xərcləyirsinizsə, Corcoran həmin vəsaitin investisiyaya yönəldilməsini və ya maliyyə məqsədlərinizə yaxınlaşdıracaq başqa məqsədlər üçün yığılmasını daha məqsədəuyğun hesab edir.

Butulkada satılan su almaq

Corcoranın lazımsız hesab etdiyi digər xərc butulkada satılan sudur. O, Nyu-Yorkun kran suyuna etibar etdiyini və demək olar ki, pulsuz əldə edilə bilən suya hər gün əlavə pul xərcləməyə ehtiyac görmədiyini deyir.

Bununla belə, hər yerdə kran suyunu içmək təhlükəsiz deyil. Yaşadığınız ərazidə suyun keyfiyyəti şübhə doğurursa, "Brita" kimi su filtri almaq daha məqsədəuyğundur. Belə filtr əvvəlcə müəyyən xərc tələb etsə də, il ərzində sizə yüzlərlə, hətta minlərlə dollar qənaət edə bilər.

Pulun cari hesabda saxlanılması

Şirkətini milyonlarla dollara satdıqdan sonra belə, Corcoran etiraf edib ki, böyük məbləğdə vəsaiti cari hesabda saxlamaq səhv qərar olub.

O, əsas kapitalını itirməkdən qorxduğu üçün investisiya etməyib. Nəticədə isə həmin vəsait nə investisiya qoyuluşunda, nə də yüksək gəlirli əmanət hesabında yerləşdirilmədiyi üçün inflyasiya səbəbindən dəyər itirib.

Pul məsələsində ehtiyatlı olmaq normaldır. Lakin həddindən artıq konservativ yanaşma gəlir imkanlarını əldən verməyinizə səbəb ola bilər.

Yüksək gəlirli əmanət hesabı adi cari hesabla müqayisədə daha çox gəlir əldə etməyin aşağı riskli yollarından biridir. Fövqəladə hallar üçün maliyyə ehtiyatı formalaşdırdıqdan sonra isə sərvətinizi artırmaq üçün digər variantları da nəzərdən keçirə bilərsiniz. Məsələn, fond bazarına, daşınmaz əmlaka investisiya qoymaq və ya kiçik biznes qurmaq yaxşı seçimlər hesab olunur. Pulunuzu necə idarə edəcəyinizə əmin deyilsinizsə, maliyyə məsləhətçisi ilə məsləhətləşmək faydalı ola bilər.

Əlavə alış xərclərini nəzərə almamaq

Daşınmaz əmlak sahəsində tanınmış sima olmasına baxmayaraq, Corcoran bir vaxtlar ev alarkən müqavilənin bağlanması ilə bağlı əlavə xərcləri düzgün hesablamadığını və onları ödəmək üçün kifayət qədər vəsaitinin olmadığını bildirib.

"İlk evimi alanda müqaviləni rəsmiləşdirməyə gedərkən əlavə bağlanma xərclərini nəzərə almamışdım. Xoşbəxtlikdən, çox mehriban satıcı həmin məbləği mənə borc verdi. Əks halda, alış baş tutmayacaqdı", – o, "CNBC Make It"ə deyib.

Pulun hər problemi həll etdiyinə inanmaq

Corcoranın fikrincə, ən vacib dərslərdən biri pulun bütün problemləri həll etməməsidir. O bildirib ki, varlı olmasına baxmayaraq narahat və ya xoşbəxt olmayan çox sayda insan tanıyır.

Pul insana daha çox azadlıq versə də, daxili narahatlıqları aradan qaldırmır və həyata məqsəd qazandırmır.

"Pulun xoşbəxtliklə heç bir əlaqəsi yoxdur. Həqiqətən də yoxdur", – Corcoran "CNBC Make It"ə müsahibəsində bildirib.

Ona görə də bütün enerjinizi yalnız daha çox pul qazanmağa yönəltməyin. Münasibətlərə, sağlamlığınıza və şəxsi hədəflərinizə də vaxt və diqqət ayırın.

Tənzilə Ağabalayeva