Məşhur brendin rəhbəri idman avtomobillərinin əsas problemini açıqladı

"Lotus" şirkətinin baş direktoru Fen Cinfen bir çox idman avtomobillərində olan əsas çatışmazlığı açıqlayıb. Maraqlıdır ki, bu problem şirkətin öz modellərinin bir hissəsinə də aiddir.

Valyuta.az xəbər verir ki, bu barədə "Autolatest" yazıb.

O, bildirib ki, 1800 kq-dan ağır olan istənilən sportkar orta səviyyəli hesab olunur. 

Diqqət çəkən məqam odur ki, "Lotus"un bir çox modelinin çəkisi bu həddi aşır. Yeganə istisna "Emira" modelidir ki, onun çəkisi versiyadan asılı olaraq 1440–1470 kq arasında dəyişir.

Bununla yanaşı, "Lotus"un elektrik modelləri — "Eletre", "Emeya" və "Evija" — hamısı 1800 kq-dan ağırdır. Xüsusilə "Eletre" elektrik krossoverinin çəkisi təxminən 2600 kq təşkil edir.

Cinfenin sözlərinə görə, yüksək güc göstəricisi avtomobil çox ağır olduqda mənasını itirir. O qeyd edib ki, elektromobillərin dövründə 2000 at gücünə çatmaq asan olsa da, ağır avtomobillər idarəetmə baxımından üstünlük təmin etmir.

Şirkət rəhbəri "Lotus"un gələcək sportkarları üçün 1,8 tonluq çəki limitini standart kimi müəyyən etdiklərini bildirib. O həmçinin qeyd edib ki, yaxın zamanda V8 mühərrikli və ümumi gücü 1000 at gücündən çox olacaq "Lotus Type 135" modeli təqdim olunacaq, lakin onun çəkisi hələ açıqlanmayıb.

Paşa Məmmədli