"Məsafəli olsa öyrənə bilməyəcək, səmimi olsa qıcıq yaradacaq" - Təcrübəçi nə etməlidir?

Təcrübə proqramına qoşulan gənclər üçün ən çətin mərhələlərdən biri iş mühitinə uyğunlaşmaq və komanda ilə sağlam münasibət qurmaqdır. Bəzən həddindən artıq səmimiyyət işçilərdə qıcıq yarada, şəxsi həyatla bağlı detallara girmək və ya əvvəlki iş yerləri haqqında mənfi danışmaq isə təcrübəçinin imicinə zərər verə bilər. Digər tərəfdən, çox məsafəli davranış da öyrənmə prosesini zəiflədərək təcrübəçinin iş həyatından soyumasına səbəb ola bilər. Bəs təcrübəçi bu balansı necə qorumalıdır?

İnsan resursları üzrə menecer, əmək və sosial münasibətlər üzrə ekspert Leyla Əsədullayeva Valyuta.az-a bildirib ki, təcrübəçilər əsasən tələbələrdən və ya çox az iş təcrübəsi olan şəxslərdən ibarət olur:

“Onlar təcrübəsini artırmaq üçün iş mühitinə yenidən daxil olan insanlardır. Təcrübəçilər müəssisədə tamamilə yeni atmosfer, yeni komanda, yeni rəhbərlik və fərqli yanaşmalarla qarşılaşırlar. Bu da təbii olaraq müəyyən balanssızlıqlara səbəb ola bilər”.

Ekspertin sözlərinə görə, bu mərhələdə məsuliyyət təkcə təcrübəçinin deyil, insan resursları şöbəsinin və struktur rəhbərlərinin üzərinə də düşür: "Balans qorunmalıdır ki, nə təcrübəçi həddindən artıq susqun olsun, nə də həddən artıq danışaraq özünə və ətrafındakılara toksik mühit yaratsın. Səmimiyyət vacibdir, amma bu səmimiyyətin içində mütləq peşəkarlıq olmalıdır”.

L.Əsədullayeva vurğulayıb ki, təcrübəçilərə ilk növbədə peşəkar davranış qaydaları izah edilməlidir: “Şəxsi həyatla bağlı mövzular və keçmişdə yaşanan neqativ hadisələr iş mühitinə daşınmamalıdır. Korporativ mədəniyyət, etik normalar, komanda ilə ünsiyyət, tapşırıqların icrası zamanı davranış qaydaları onlara öyrədilməlidir. Emosiyalar işə, iş isə evə daşınmamalıdır”.

Ekspert hesab edir ki, təcrübəçilər üçün ilk mərhələdə müşahidə daha önəmlidir: "Onlar əvvəlcə müşahidə etməli, prosesi anlamalı və analiz etməlidirlər. Bu, öyrənməni daha effektiv edir. Eyni zamanda sual vermək üçün rahat mühit yaradılmalıdır”.

Onun sözlərinə görə, bütün bunlarla yanaşı, komanda üzvlərinin də üzərinə mühüm vəzifə düşür: “Komanda anlamalıdır ki, bu şəxs yenidir və ondan dərhal peşəkarlıq gözləmək olmaz. Təcrübəçinin gəldiyi mühit də onun üçün yenidir. Buna görə də yeni əməkdaşlara və təcrübəçilərə dəstək göstərilməlidir”.

Sonda ekspert qeyd edib ki, maddi zərər riski olmayan hallarda təcrübəçini sınaqdan keçirməkdən çəkinmək lazım deyil: “Təcrübəçi öyrənmək üçün oradadır, səhv edə bilər. Əsas odur ki, bu səhvlər inkişaf üçün fürsətə çevrilsin".

Sərvanə Rəmixanova