Redaktor
2026-cı ildə ziyarət etməyə dəyər 7 yer: Sizi əbədi olaraq dəyişəcək
2026-cı il bütün çətinliklərə baxmayaraq, səyahət etməyə və uzun müddət yadda qalacaq təəssüratlar toplamağa davam etməyin vacib olduğu bir il kimi dəyərləndirilir.
Valyuta.az xəbər verir ki, “InsureAndGo” nəşri ruhu “qidalandırmaq” üçün mütləq ziyarət edilməli olan 7 məkanı açıqlayıb.
1. Kanazava, Yaponiya
Tokioda səs-küy hökm sürür, Kiotoda məbədlər var. Kanazava isə zamanın yavaşladığını hiss etmək üçün gedilən yerdir. Mükəmməl qorunmuş samuray məhəlləsi, dünya səviyyəli bağlar və canlı sənətkarlıq mədəniyyəti arxa planda köhnə Yaponiyanın səssizcə döyündüyü təəssüratını yaradır.
Kanazavada samuray məhəllələrində gəzmək, XXI əsr Müasir İncəsənət Muzeyini ziyarət etmək və qızıl yarpaqları ilə bəzədilmiş dondurma dadmaq mümkündür.
Bundan əlavə, Yaponiyada dəniz kənarında Yayoı Kusamanın nəhəng balqabaqları və torpağa sanki qarışan muzeyləri ilə tanınan Naosima “incəsənət adası”nı görmək tövsiyə olunur.
Həmçinin Kiso vadisi diqqətəlayiqdir. Burada Nakasendo yolu ilə keçmişə səyahət etmək, Edo dövrünə aid yaxşı qorunmuş poçt şəhərləri olan Maqome və Tsumago arasında piyada yürüş etmək olar.
2. San-Pedro-de-Atakama, Çili
San-Pedro-de-Atakama ziddiyyətlər məskənidir. Burada dünyanın ən quraq səhrası ilə Patagoniyanın buzlaqlarla örtülü zirvələri bir araya gəlir. Atakama səhrasında ulduzları seyr etmək və duzlu laqunlarda üzmək mümkündür.
Çilidə həmçinin mural rəsmləri ilə başdan-başa bəzədilmiş bohem liman şəhəri Valparaiso, mifləri, taxta kilsələri və balıqçı kəndləri ilə məşhur Çiloe adası ziyarətə dəyər.
Patagoniyanın incisi sayılan Torres bölgəsində W Trek marşrutu ilə yürüş etmək, buzlaqların yanından üzmək və ya sadəcə mənzərələri seyr etmək olar.
3. Bled gölü, Sloveniya
Sloveniya kiçik ölkədir, lakin burada görməli yerlər gözləniləndən çoxdur. Alp gölləri, üzüm vadiləri və əjdahalar tərəfindən qorunan körpülər bu ölkədə həyatın canlılığı ilə sakitliyin eyni anda hiss olunmasına səbəb olur.
Bled gölündə qayıqla kiçik ada üzərindəki kapellaya getmək, arzu zəngini çalmaq və Oystritsa müşahidə meydançasına qalxaraq uzun müddət yadda qalan panoramaya baxmaq mümkündür.
Lyublyana ekoloji paytaxt kimi tanınır. Burada çay kənarında qəhvə içmək, strit-art yanından velosiped sürmək və canlı qastronomik mühiti kəşf etmək olar.
Triglav Milli Parkında isə Yuli Alp dağlarını, zümrüd rəngli Soça çayını, dağ aşırımlarını və yaşıl dərələrdəki şəlalələri görmək mümkündür.
4. Cənubi Afrika
Cənubi Afrika insanı tez buraxmır. Burada bir gün ərzində mənzərələr dağlardan üzüm bağlarına, savannalara qədər dəyişir.
Krüger Milli Parkında zürafə və filləri görmək, təbiətin mühafizəsinə həsr olunmuş oteldə qalmaq və gecə aslanların səslərini dinləmək mümkündür.
Keyptaun dağlar və okeanla əhatə olunmuş şəhərdir. Masa dağının zirvəsinə qalxmaq, Bo-Kaap məhəlləsinin rəngarəng küçələrində gəzmək və Camps Bay körfəzində gün batımından zövq almaq tövsiyə olunur.
Stellenboş və Fransxhuk üzüm vadiləri velosipedlə və ya tramvayla kəşf edilə bilər – dequstasiyalar və palıd ağacları altında uzun naharlarla.
5. Tofino, Kanada
Tofino dünyanın sonu kimi hiss olunur – ən yaxşı mənada. Burada yağış meşələri Sakit okeanın vəhşi sahilləri ilə iç-içədir.
Çestermen çimərliyində sahil boyu gəzmək, isti içki ilə dalğaların sahilə vurmasını seyr etmək xüsusilə xoşdur.
Sakit okean sahili Milli Park-qoruğunda tropik meşə cığırları ilə gəzmək və ya sakit körfəzlərdə kayak sürərək okeanı və qartalları seyr etmək olar.
Yuklyulet isə yerli ab-havası və möhtəşəm balıq-kartof fri yeməyi ilə seçilən sakit liman şəhərciyidir.
6. Tonqarairo Milli Parkı, Yeni Zelandiya
Tonqarairo həqiqətən epik məkandır: vulkanlar, zümrüd göllər və yerin öz tarixini hiss etdirən atmosfer səyahətçiləri müşayiət edir.
Burada dünyanın ən yaxşı birgünlük yürüş marşrutlarından biri olan Tonqarairo Alpine Crossing yerləşir. Marşrut kraterlərdən və sürreal Zümrüd göllərindən keçir, həmçinin maorilər üçün müqəddəs sayılan Ngauruhoue dağını seyr etməyə imkan verir.
Vakapapa kəndi milli parkı araşdırmaq üçün ideal bazadır. Ərazinin mədəni əhəmiyyətini anlamaq üçün Tonqarairo ziyarətçi mərkəzinə baş çəkmək tövsiyə olunur.
Taupo isə termal mənbələri və şəlalələri olan göl kənarı şəhərdir.
7. Matera, İtaliya
İtaliyanın cənubunda əhəngdaşı dərəsində oyulmuş Matera zamansız görünsə də, heç vaxt bu qədər müasir olmayıb.
Burada yerləşən Sassi-di-Matera qədim mağara yaşayışları və qaya kilsələrindən ibarətdir. Onların bir çoxu bərpa edilərək butik otellərə, şərab barlarına və sənət qalereyalarına çevrilib.
San-Pyetro-Kaveozo meydanı gün batımını bir qədəh “Aqlianiko” şərabı ilə seyr etmək üçün idealdır. Murgiya Milli Parkı isə cığırları, mağaraları və panoramik mənzərələri ilə unudulmaz təbiət qaçışı vəd edir.
Paşa Məmmədli
