İran neft satışlarından milyardlarla dollar gəlir əldə edib

Yaxın Şərqdə müharibənin başlamasından sonra İranın neft satışlarından milyardlarla dollar gəlir əldə etdiyi bildirilir.

Valyuta.az xəbər verir ki, Bloomberg-in məlumatına görə, artan neft qiymətləri və Hörmüz boğazı üzərindən ixrac imkanlarını qoruyan İran digər istehsalçılardan fərqli olaraq satışlarını davam etdirə bilib.

Məlumata əsasən, İran mart ayında əsas “Iranian Light” markalı neft satışından gündəlik təxminən 139 milyon dollar gəlir əldə edib. Bu göstərici fevral ayında 115 milyon dollar səviyyəsində idi.

Qeyd olunur ki, regiondakı digər ölkələr hasilatı azaltmağa və ya alternativ ixrac marşrutları axtarmağa məcbur olduğu halda, İran Fars körfəzindən tanker yükləmələrini davam etdirib.

Eyni zamanda, ölkənin enerji ixracı gündəlik təxminən 1,6 milyon barel səviyyəsində qalaraq müharibədən əvvəlki göstəricilərə yaxın olub.

Bundan əlavə, İranın nefti qlobal Brent markasına nisbətdə daha dəyərli olub və endirim fərqi son günlərdə 2,10 dollar/barel səviyyəsinə qədər azalıb.

Məlumata görə, İran həmçinin Hörmüz boğazından keçən bəzi kommersiya gəmilərindən 2 milyon dollara qədər tranzit haqqı alaraq əlavə gəlir əldə edir.

Sərvanə Rəmixanova