Musiqi startapları artıq mahnı yaratmağa maraq göstərmir

Bir neçə il əvvəl musiqi sənayesində əsas müzakirə mövzusu süni intellektin musiqiçiləri əvəz edib-etməyəcəyi idi. Lakin 2026-cı ildə mənzərə dəyişib.

Valyuta.az xəbər verir ki, "Deezer" platformasının məlumatına görə, hazırda hər gün təxminən 75 min tamamilə süni intellekt tərəfindən yaradılmış mahnı yayımlanır. Bu, platformaya əlavə olunan yeni musiqilərin 44 faizini təşkil edir.

Buna baxmayaraq, AI ilə yaradılan mahnılar ümumi dinlənmələrin cəmi 1-3 faizini təşkil edir. "Deezer" bu mahnıların təxminən 85 faizini isə saxta fəaliyyət şübhəsi ilə monetizasiyadan çıxarır. Başqa sözlə, süni intellektlə hazırlanan musiqinin sayı sürətlə artsa da, dinləyici marağı hələ də məhduddur.

Elə buna görə də startaplar artıq mahnı deyil, musiqi sənayesinin problemlərini həll edir

Belə ki, Barselonada keçirilən "Sónar+D 2026" tədbirində təqdim olunan 9 startap layihəsinin heç biri AI vasitəsilə mahnı yaratmaq üzərində çalışmırdı. Əvəzində şirkətlər diqqəti musiqi sənayesinin uzun illər ölçülməyən və ya səmərəsiz qalan sahələrinə yönəldiblər.

Fransanın "Music Magnet" startapı audio tanıma texnologiyası vasitəsilə klublarda hansı mahnıların, harada və nə vaxt səsləndiyini müəyyən edir. Şirkətin təsisçisi Frederik Ero hesab edir ki, yeni musiqi janrları məhz rəqs meydançalarında formalaşır, lakin bu məlumatların böyük hissəsi müəllif hüquqları və gəlir sistemlərinə daxil olmur.

Fransanın "2AM" şirkəti festivallar və tədbir təşkilatçıları üçün AI əsaslı "Audience Experience Engine" platforması hazırlayıb. Sistem sosial şəbəkələr və bilet platformalarında səpələnmiş auditoriya məlumatlarını bir mərkəzdə toplayaraq təşkilatçılara təqdim edir.

Şirkət artıq Paris yaxınlığında keçirilən və 180 min iştirakçını cəlb edən "Rock en Seine" festivalında texnologiyasını sınaqdan keçirib.

Musiqi məhsullarının satışında yeni imkanlar

Parisdə fəaliyyət göstərən "Yaarz" startapı canlı konsertlərdə fanatlara birbaşa məhsul satışı üçün platforma yaradıb. Layihə "Fransa Sony Music", Milli Musiqi Mərkəzi (CNM) və dövlət investisiya bankı "Bpifrance" tərəfindən dəstəklənərək 1 milyon avro investisiya cəlb edib.

Süni intellekt Parkinson xəstələrinə kömək edir

Almaniyanın "Parkinsonic" startapı isə musiqi texnologiyasını səhiyyə sahəsinə tətbiq edir. Platforma Parkinson xəstələrinin hərəkətlərini analiz edir və fərdiləşdirilmiş musiqi seansları hazırlayır.

Sistem süni intellekt vasitəsilə xəstənin vəziyyətini qiymətləndirərək ritm və musiqidən terapevtik vasitə kimi istifadə edir.

Gənc musiqiçilər üçün yeni platforma

İtaliyanın "HAT Music" tətbiqi gənc sənətçiləri menecerlər, prodüserlər, vokal müəllimləri və digər peşəkarlarla əlaqələndirir. Platformadakı "Sofia AI" köməkçisi istifadəçilərə uyğun tərəfdaşların tapılmasına yardım edir.

Şirkətin məlumatına görə, artıq 10 minə yaxın musiqiçi platforma vasitəsilə menecer tapıb.

"Sónar+D 2026"da təqdim olunan layihələr göstərir ki, musiqi sənayesində süni intellektə yanaşma dəyişir. Əgər 2024-cü ildə əsas qorxu AI-nin musiqiçiləri əvəz etməsi idisə, bu gün startaplar süni intellekti musiqi yaratmaq üçün deyil, sənayenin idarə olunması, məlumatların analizi, auditoriya ilə əlaqələr və səhiyyə kimi sahələrdə tətbiq etməyə üstünlük verirlər.

Sərvanə Rəmixanova