“Groq” startapı 650 milyon dollar investisiya aldı

“Groq” 650 milyon dollar həcmində yeni investisiya əldə edib. ABŞ mərkəzli şirkətin investisiya raunduna “Disruptive” və “Infinitum” birgə rəhbərlik edib.

Valyuta.az xəbər verir ki, süni intellekt çip startapı olan “Groq”un ötən ilin sentyabrında 6,9 milyard dollar dəyərləndirmə ilə 750 milyon dollar investisiya cəlb etdiyi bildirilmişdi.

Şirkət bildirib ki, cəlb olunan vəsait süni intellekt üzrə inferens (inference) bulud xidmətlərinin genişləndirilməsinə, məlumat mərkəzlərinin tutumunun artırılmasına və yeni mütəxəssislərin işə cəlb edilməsinə yönəldiləcək.

Şirkət “Google”un maşın öyrənməsi üçün hazırladığı TPU çiplərinin yaradılmasında iştirak etmiş mühəndislərdən biri olan Conatan Ross (Jonathan Ross) tərəfindən təsis edilib. “Groq” süni intellekt modellərinin, xüsusilə də inferens mərhələsinin sürətləndirilməsi üçün həm aparat, həm də proqram təminatı infrastrukturu hazırlayır.

Başqa sözlə, şirkət süni intellekt modeli təlim prosesini tamamladıqdan sonra istifadəçilərin sorğularına sürətli və aşağı gecikmə ilə cavab verilməsini təmin edən sistemlər yaradır. Şirkətin əsas məhsulu “Language Processing Unit” (LPU) adlanan xüsusi süni intellekt prosessorlarıdır.

Bu çiplər GPU-lara alternativ olaraq hazırlanıb və xüsusilə böyük dil modellərinin daha səmərəli və sürətli işləməsini hədəfləyir. “Groq” bu avadanlığı birbaşa satmaq əvəzinə, əsasən öz bulud platforması vasitəsilə təqdim edir. Son illərdə şirkət yalnız çip istehsalçısı olmaqdan çıxaraq, süni intellekt yönümlü bulud infrastrukturu təmin edən neobulud (neocloud) şirkətinə çevrilib.

Şirkət məlumat mərkəzləri vasitəsilə tərtibatçılara və müəssisələrə süni intellekt hesablama gücü təqdim edir. Bu, istifadəçilərə öz modellərini işlətmək imkanı yaradır. “Groq” həmçinin API-lər vasitəsilə generativ süni intellekt tətbiqlərinin hazırlanmasına şərait yaradır və yüksək həcmdə token emalı imkanları təqdim edir.

Mayya Hüseynova