“Banco Santander” süni intellekt agentləri üçün ödəniş sistemi qurdu

İspaniyanın “Banco Santander, S.A.” bankı süni intellekt əsaslı ticarət və ödəniş həllərinin inkişafı istiqamətində yeni addımlar atır.

Valyuta.Az-ın verdiyi xəbərə görə, bankın ödəniş xidməti platforması olan “Getnet” süni intellekt agentlərinin həyata keçirdiyi ödənişlərin avtomatik qəbulunu və emalını təmin edən yeni təhlükəsiz sistemi istifadəyə verib.

Meksika və Latın Amerikası bazarlarında “Getnet” “Mastercard” və Meksikanın fintex şirkəti “Neivor” ilə əməkdaşlıq çərçivəsində “Mastercard Agent Pay” texnologiyası vasitəsilə ilk real əməliyyatı uğurla həyata keçirib. Şirkət gələcəkdə “Visa Intelligent Commerce” platforması ilə inteqrasiyanı da genişləndirməyi planlaşdırır.

“Getnet”in baş icraçı direktoru Xuan Franko bildirib ki, əsas məqsəd ticarətçilər, rəqəmsal platformalar və süni intellekt agentləri arasında təhlükəsiz və etibarlı ödəniş mühiti yaratmaqdır. Onun sözlərinə görə, bu infrastruktur süni intellektə əsaslanan yeni alış-veriş təcrübələrinin yayılmasına kömək edəcək.

Bundan əlavə, 2026-cı il iyunun 3-də “Banco Santander” və Birləşmiş Ərəb Əmirliklərinin Əbu-Dabi şəhərində yerləşən “G42” texnologiya qrupu süni intellekt layihələrinin birgə hazırlanmasına dair Anlaşma Memorandumu imzalayıblar. Sənədə əsasən, tərəflər “G42”nin texnoloji imkanlarını “Banco Santander”in bankçılıq və tənzimləmə sahəsindəki təcrübəsi ilə birləşdirərək yeni süni intellekt həlləri hazırlayacaqlar. Bu həllər bank xidmətlərinin təkmilləşdirilməsi və müştərilərə daha fərdiləşdirilmiş məsləhət xidmətlərinin göstərilməsi üçün nəzərdə tutulub.

Qeyd edək ki, “Banco Santander” 1857-ci ildə İspaniyada yaradılıb. Baş qərargahı bu ölkədə yerləşən bank Avropa və Amerika qitələrində fəaliyyət göstərən ən iri maliyyə qurumlarından biri hesab olunur və pərakəndə, eləcə də korporativ bankçılıq xidmətləri təqdim edir.