"Apple"ın 2026-2027-ci illərdə təqdim edəcəyi 20 yeni cihaz - TAM SİYAHI

“Apple” 2026–2027-ci illər ərzində məhsul xəttində indiyədək ən genişmiqyaslı yenilənmələrdən birinə hazırlaşır. 

Valyuta.az xəbər verir ki, “Bloomberg” və etibarlı insayderlərin məlumatına görə, şirkət 2027-ci ilin sonuna qədər təxminən 20 yeni cihaz təqdim etməyi planlaşdırır.

“MacRumors” tərəfindən hazırlanan siyahıya həm mövcud məhsulların təkmil versiyaları, həm də tam yeni kateqoriyalar daxildir. Bunlara ilk qatlanan "iPhone" və süni intellektlə işləyən geyilə bilən cihazlar da aiddir.

iPhone

2026-cı ilin əsas yeniliklərindən biri "iPhone 18 Pro" və "iPhone Pro Max" seriyası olacaq. Sızan məlumatlara görə, yeni modellər 2 nanometrlik texnoloji proseslə istehsal edilən A20 Pro çipi, daha kiçik “Dynamic Island” və qismən ekran altında yerləşdirilən Face ID sistemi ilə gələcək. Bu dəyişikliklər ekran üzərindəki ənənəvi kəsikləri xeyli azalda bilər.

Xüsusi diqqət qatlanan "iPhone" modelinə yönəlib. Cihaz kitab kimi açılacaq və təxminən 5,3–5,7 düymlük xarici ekran, açıldıqda isə 7,7–7,8 düymlük daxili ekran təqdim edəcək. Açıq vəziyyətdə cihaz kiçik planşeti xatırladacaq. Face ID əvəzinə Touch ID istifadəsi ehtimal olunur.

Bundan əlavə, baza "iPhone 18", büdcə yönümlü "iPhone 18e" və "iPhone Air"in ikinci nəsli də planlaşdırılır. Bu modellərin təqdimatı 2027-ci ilin payızına qədər uzana bilər ki, bu da "iPhone" buraxılış dövrünü iki mövsümə bölə bilər.

2027-ci ilin payızında isə “Apple” "iPhone" 20 adlı yubiley modelini təqdim edə bilər. Bu cihazın əsas özəlliyi ön paneli tamamilə tutan ekran olacaq — nə “çuxur”, nə “ada”, nə də kamera üçün hər hansı deşik.

Apple Watch

Bu payız “Apple” "Apple Watch Series 12" və "Apple Watch Ultra 4" modellərini təqdim edəcək. Yeni çiplər, tamamilə yenilənmiş dizayn və təkmilləşdirilmiş sensorlar gözlənilir.

Şirkət həmçinin qanda şəkərin qeyri-invaziv ölçülməsi texnologiyası üzərində işləyir, lakin bu funksiyanın hələ satışa hazır olmadığı bildirilir.

iPad

Ən ucuz planşet seriyasının yeni nəsli — "iPad 12" — A18 və ya A19 səviyyəli çip ilə təchiz ediləcək. Bu, "iPad 11" ilə müqayisədə ciddi performans artımı və “Apple Intelligence” dəstəyi təmin edəcək.

iPad mini də yenilənəcək: OLED ekran, A19 Pro və ya A20 Pro səviyyəli çip, yaxşılaşdırılmış suya davamlılıq və yenilənmiş səs sistemi ilə gələcək.

Mac

“Mac” ailəsi son illərin ən böyük dizayn yenilənmələrindən birini yaşayacaq. Yeni "MacBook Pro" sensorlu OLED ekran, iPhone-dakı “Dynamic Island”a bənzər interfeys elementi və daha nazik korpusla təqdim oluna bilər.

Digər "Mac" modelləri isə yeni çiplərlə yenilənəcək: "Mac Studio M5 Max" və "M5 Ultra", "Mac mini M5" və "M5 Pro", "iMac" isə M5 çipi və yeni rəng seçimləri ilə gələcək.

Yeni HomePod, AirPods, Apple eynəkləri

“Apple” kameralı "AirPods" üzərində işləməyə davam edir. Kameralar qulaqlıqların gövdəsinə yerləşdiriləcək və foto və ya video çəkmək üçün deyil, "Siri"nin yeni funksiyalarını gücləndirmək üçün istifadə olunacaq. Məsələn, istifadəçi soyuducudakı məhsullara baxaraq nə bişirə biləcəyini soruşa biləcək.

Bundan başqa, kameralı və mikrofonlu “ağıllı” eynəklər də hazırlanır. Bu cihazlar "Meta Ray-Ban"a rəqib olacaq və “Apple”ın yeni süni intellekt ekosisteminin bir hissəsi olacaq.

Ev texnologiyaları sahəsində də yeniliklər gözlənilir. Xüsusilə “ağıllı” ev mərkəzi (home hub) cihazı diqqət çəkir. Bu cihaz evdəki bütün smart sistemləri birləşdirən mərkəz rolunu oynayacaq.

“Apple” həmçinin məhsulların əksəriyyətinin qiymətini artırmağa hazırlaşır. Analitiklərin hesablamalarına görə, "iPhone 18 Pro" təxminən 1400 dollar, "iPhone 18 Pro Max" isə 1500 dollar civarında ola bilər.

Qeyd olunur ki, “Apple” CEO-su Tim Kuk uzun illərdən sonra vəzifəsini tərk edəcək və onu Con Ternus əvəz edəcək. Yeni rəhbər şirkətin gələcəyi ilə bağlı “Apple yenidən dünyanı dəyişməyə hazırdır” fikrini səsləndirib.

Paşa Məmmədli