Elektrikli avtomobil satış platforması 31 milyon dollar investisiya alıb

ABŞ mərkəzli “Ever” şirkəti 31 milyon dollar həcmində A seriyası investisiya raundunu uğurla başa çatdırıb. 

Valyuta.az xəbər verir ki, şirkət cəlb olunan vəsaiti süni intellekt dəstəyi ilə işləyən avtomobil satış platformasının inkişafına və elektrikli nəqliyyat vasitələri bazarında böyümənin sürətləndirilməsinə yönəldəcəyini açıqlayıb.

“Ever” 2022-ci ildə ABŞ-da Lasse-Matias Nyberq (Lasse-Matias Nyberg), Maksimilian Kvertermous (Maximilian Quartermain) və TJ Kasner tərəfindən təsis edilib. Şirkət tamamilə elektrikli nəqliyyat vasitələrinə (EV) fokuslanan avtomobil alqı-satqısı və pərakəndə satış platforması kimi fəaliyyət göstərir.

Platforma həm onlayn bazar yeri təqdim edərək alıcı və satıcılara internet üzərindən əməliyyat aparmaq imkanı yaradır, həm də fiziki mağazalar vasitəsilə istifadəçilərə avtomobilləri yerində görmək və sınaqdan keçirmək imkanı verir. Bu hibrid model, xüsusilə elektrikli nəqliyyat vasitələrini ilk dəfə qiymətləndirən müştərilər üçün üstünlük hesab olunur.

“Ever”in əsas fərqi süni intellekt və rəqəmsal infrastruktura əsaslanmasıdır. Platforma avtomobil alqı-satqısı prosesinin mərhələlərini avtomatlaşdıraraq qiymətləndirmə, qiymət təyini, qeydiyyat, inventar idarəetməsi və müştəri proseslərini vahid sistem üzərindən idarə edir.

Bu yanaşma satış komandasının iki-üç dəfə daha səmərəli fəaliyyət göstərməsinə şərait yaradır, xərcləri azaldır və mənfəəti artırır. Şirkətin gəlir modeli əsasən avtomobil satışından əldə olunan mənfəət və əməliyyat haqlarına əsaslanır. Alıcılar vahid platforma üzərindən avtomobili araşdıra, qiymət təklifi ala, sınaq sürüşü həyata keçirə və satınalma prosesini tamamlaya bilirlər. Satıcılar isə nəqliyyat vasitələrini asanlıqla siyahıya əlavə edərək satış prosesini izləyə bilirlər.

Mayya Hüseynova