Çinli mühəndis robot “gözləri” ilə milyarder oldu

Çinli mühəndis Hovard Huanq humanoid robotlar üçün 3D görmə sensorları istehsal edən “Orbbec” şirkəti ilə milyarderə çevrilib.

Valyuta.az xəbər verir ki, Şençjen əsaslı şirkət robotların ətraf mühiti insan kimi qavramasına imkan verən qabaqcıl 3D kameralar və lidar sensorları hazırlayır. Bu texnologiya 2025-ci ildə Pekində keçirilən Dünya humanoid robot oyunlarında istifadə olunub. Yarışda fərqlənən “X-Humanoid” institutunun robotları məhz “Orbbec” sensorları ilə təchiz edilib.

2013-cü ildə təsis olunan “Orbbec” əvvəlcə 3D skan və biometrik həllər üzərində çalışıb, daha sonra robototexnika sahəsinə yönəlib. Şirkət 2025-ci ilin ilk doqquz ayında 69 milyon yuan xalis mənfəət əldə edib, gəlirləri isə iki dəfədən çox artaraq 714 milyon yuana çatıb. Səhmlərin kəskin bahalaşması nəticəsində şirkətdə 27 faiz paya sahib olan Huanqın sərvəti 1,6 milyard dollar səviyyəsinə yüksəlib.

Şirkətin müştəriləri arasında “Ant Group”un “Alipay” platforması, həmçinin Çin və Cənubi Koreyanın xidmət və sənaye robotları istehsalçıları yer alır. “Orbbec” humanoid robot bazarının sürətlə böyüməsindən faydalanmaq üçün yeni nəsil sensorların hazırlanmasına və istehsal gücünün artırılmasına investisiya yatırır.

Analitiklərin proqnozlarına görə, qlobal humanoid robot bazarı uzunmüddətli perspektivdə trilyonlarla dollar dəyərində ola bilər. Huanq isə süni intellektin inkişafı fonunda robototexnika sahəsinin gələcəyini “ulduzlar və dəniz qədər geniş” qiymətləndirir.

Tənzilə Ağabalayeva