Divar təmizləyicisindən milyonlarla uşağın sevimli oyuncağına çevrilmə...

Rəngarəng görünüşü, özünəməxsus qoxusu və yumşaq quruluşu ilə tanınan "Play-Doh" bu gün dünyanın ən məşhur uşaq oyuncaqlarından biridir. Lakin az adam bilir ki, bu məhsul əvvəlcə uşaqlar üçün deyil, divar kağızlarını kömür tozundan təmizləmək məqsədilə hazırlanmışdı.

İlk məqsədi divarları təmizləmək idi

Valyuta.az xəbər verir ki, 1930-cu illərin əvvəllərində ABŞ-ın Sinsinnati şəhərində fəaliyyət göstərən "Kutol Products" şirkətinin əməkdaşı Noah MakViker kömür sobalarının yaratdığı his və tozu divar kağızlarından təmizləmək üçün xüsusi yumşaq kütlə hazırlayıb. Həmin dövrdə evlərdə kömürdən geniş istifadə olunduğu üçün bu məhsula böyük tələbat var idi.

Lakin İkinci Dünya müharibəsindən sonra yuyula bilən vinil divar kağızlarının yayılması ilə təmizləyici məhsula ehtiyac azaldı və satışlar kəskin şəkildə aşağı düşdü.

Uşaqların oyunu yeni biznes ideyasına çevrildi

1950-ci illərin ortalarında Noah MakVikerin qardaşı oğlu Cozef MakViker müəllim işləyən qohumu Key Zufalldan maraqlı xəbər aldı. Məlum oldu ki, məktəbəqədər yaşlı uşaqlar divar təmizləyicisini müxtəlif fiqurlar hazırlamaq üçün istifadə edir və bundan böyük zövq alırlar.

Bu fikir MakVikerləri məhsulu oyuncaq kimi bazara çıxarmağa sövq etdi. Onlar 1956-cı ildə "Rainbow Crafts Company" şirkətini yaradaraq məhsulun istehsalına başladılar və ona "Play-Doh" adını verdilər.

"Play-Doh"

"Play-Doh" ilk dəfə 1957-ci ildə ABŞ-da oyuncaq mağazalarında satışa çıxarıldı. Əvvəlcə yalnız ağ rəngdə təqdim olunan məhsula qısa müddət sonra qırmızı, sarı və mavi rənglər də əlavə edildi. Yumşaq quruluşu sayəsində uşaqlar müxtəlif fiqurlar hazırlaya bilir, bu isə oyuncağın populyarlığını sürətlə artırırdı.

1965-ci ildə Noah və Cozef MakViker məhsulun patentini aldılar. "Play-Doh"un dəqiq resepti bu gün də kommersiya sirri olaraq qalır. Məlum olan yalnız odur ki, məhsul əsasən su, duz və un əsaslı qarışıqdan hazırlanır və zəhərli deyil.

Bir neçə dəfə sahib dəyişdi

1965-ci ildə MakVikerlər "Rainbow Crafts Company"ni "General Mills" şirkətinə satdılar. Sonrakı illərdə brend əvvəlcə "Kenner Products", daha sonra "Tonka"nın tərkibinə keçdi. 1991-ci ildə isə "Hasbro" "Tonka"nı satın alaraq "Play-Doh"u "Playskool" bölməsinə daxil etdi.

Şirkət sonrakı illərdə müxtəlif qəliblər, preslər və oyun dəstləri təqdim etməklə məhsul çeşidini daha da genişləndirdi.

700 milyon funtdan çox satış və özünəməxsus qoxu

Bu günədək dünyada 700 milyon funtdan çox "Play-Doh" satılıb. Oyuncağın özünəməxsus qoxusu o qədər məşhurlaşıb ki, 2000-ci illərdə onun 50 illiyi münasibətilə həmin qoxunu əks etdirən məhdud sayda ətir də hazırlanıb.

Bundan başqa, hər il sentyabrın 18-i ABŞ-da Milli "Play-Doh" Günü kimi qeyd olunur.

"Play-Doh"un hekayəsinə əsasən deyə bilərik ki, bəzən tamamilə başqa məqsədlə yaradılan bir məhsul təsadüfi ideya sayəsində dünyanın ən tanınmış brendlərindən birinə çevrilə bilər.

Rəfiqə Abdin