"Chevron" və "Quantum Energy" “Lukoil”in beynəlxalq aktivlərini almaq istəyir

"Chevron Corp" və özəl investisiya qrupu "Quantum Energy Partners" sanksiyalara məruz qalmış Rusiyanın "Lukoil" şirkətinin beynəlxalq aktivlərini birgə almaq üçün təklif verməyi planlaşdırır.

Valyuta.az xəbər verir ki, söhbət 22 milyard dollar dəyərində aktivlərdən gedir.

Əgər razılaşma baş tutarsa, "Chevron" və "Quantum" aktivləri öz aralarında bölüşdürəcək. Bildirilir ki, potensial razılaşmada əsas rolu "Quantum" oynayır və məqsəd "Lukoil"in beynəlxalq portfelinin tamamını əhatə etməkdir.

Sözügedən portfelə neft və qaz hasilatı sahələri, emal müəssisələri, həmçinin Avropa, Asiya və Yaxın Şərqdə yerləşən 2000-dən çox yanacaqdoldurma məntəqəsi daxildir.

Xatırladaq ki, ABŞ 2025-ci ilin oktyabrında "Lukoil" və "Rosneft" də daxil olmaqla Rusiyanın əsas enerji şirkətlərinə qarşı sərt sanksiyalar tətbiq edib. Vaşinqton bu addımla Moskvanı Ukrayna ilə atəşkəsə razı salmağa çalışır.

"Lukoil" həmin dövrdə bəyan etmişdi ki, tətbiq edilən sanksiyalar səbəbindən beynəlxalq aktivlərini satmaq niyyətindədir. Şirkətin hazırda "Carlyle" və Əbu-Dabidə yerləşən "International Holding Company" konsorsiumu da daxil olmaqla bir neçə böyük investor qrupundan təklif aldığı bildirilir.

Mayya Hüseynova