Tim Kuk ötən il 74,3 milyon dollar qazanıb

“Apple”ın baş icraçı direktoru Tim Kuk 2025-ci ildə 74,3 milyon dollar gəlir əldə edib. Onun qazancının əsas hissəsini səhmə əsaslanan mükafatlar təşkil edib. Şirkətin illik hesabatına əsasən, performansa bağlı stimullar nəticəsində ümumi gəlir əvvəlki illə müqayisədə artıb.

Valyuta.az xəbər verir ki, 2023-cü ildə Tim Kuk 63,2 milyon dollar, 2024-cü ildə isə 74,6 milyon dollar gəlir əldə edib. Beləliklə, 2025-ci ildəki göstərici ilə müqayisədə cüzi azalma qeydə alınıb.

Kukun ümumi gəlir paketində cəmi 3 milyon dollar sabit maaş təşkil edib. Ən böyük pay 57,5 milyon dollarlıq səhmə əsaslanan mükafatlara düşür. Bundan əlavə, o, 12 milyon dollar dəyərində fəaliyyətə əsaslanan nağd bonus və 1,76 milyon dollar dəyərində əlavə imkanlar (təhlükəsizlik, şəxsi uçuşlar, sığorta və pensiya əlavələri daxil olmaqla) əldə edib.

Şirkət təhlükəsizlik və əməliyyat səbəblərinə görə Tim Kukun həm işgüzar, həm də şəxsi səfərlərində xüsusi təyyarədən istifadə etməsini məcburi sayır. “Apple” 2025-ci il üçün onun üçün 59 milyon dollarlıq hədəf maaş paketi müəyyən etsə də, nəticə etibarilə bu məbləğ aşılmış olub.

2025-ci ildə şirkətin digər yüksəkvəzifəli rəhbərləri də yüksək gəlirlərlə diqqət çəkiblər. Hüquq müşaviri vəzifəsindən ayrılan Keyt Adams, əməliyyat direktoru Sabih Xan və pərakəndə ilə insan resurslarına cavabdeh Dirdr O’Brayanın hər biri təxminən 27 milyon dollarlıq ümumi gəlir əldə edib.

Həmin il şirkətdə maliyyə direktoru (CFO) dəyişikliyi baş verib: keçmiş CFO Luka Maestri 15,5 milyon dollar, yeni CFO Kevan Parekh isə 22,5 milyon dollar gəlir əldə edib.

Mayya Hüseynova