Bu startap 96 milyonluq investisiya qazandı

ABŞ mərkəzli nüvə texnologiyaları startapı "Antares" B seriyası investisiya raundunda 96 milyon dollar vəsait topladığını açıqlayıb.

Valyuta.az xəbər verir ki, investisiyanın 71 milyon dolları kapital, 25 milyon dolları isə borc maliyyələşməsi formasında təmin olunub.

"Antares" aldığı bu vəsaiti mikroreaktor texnologiyasının inkişafı, prototip istehsalı və 2027-ci ildə tam gücü ilə işləyəcək reaktorun istifadəyə verilməsi üçün xərcləyəcək.

2023-cü ildə Jordan Bramble və Julia Dewahl tərəfindən qurulan şirkət kiçik modulyar nüvə reaktorları hazırlayır. Antares-in R1 mikroreaktoru 100 kVt – 1 MVt arasında elektrik enerjisi istehsal edə bilir və quru, dəniz, hətta kosmik mühitlərdə istifadə üçün nəzərdə tutulur.

Antares hazırda ABŞ Enerji Nazirliyi tərəfindən dəstəklənən proqramda iştirak edir və 2026-cı ildə prototipi sınaqdan keçirməyi, 2027-ci ildə isə tam istismara başlamağı planlaşdırır.

Sərvanə Rəmixanova