Bu investisiya şirkətinin dövriyyə itkiləri böyüyür - 1,8 milyardlıq azalma!

"CFI Financial İnvestisiya Şirkəti"nin 2025-ci ilin yanvar-avqust aylarında “Bakı Fond Birjası”da (BFB) apardığı əməliyyatların həcmi 199,2 milyon manat təşkil edib. 

Valyuta.az-ın hesablamasına görə, investisiya şirkətinin birja əməliyyatları son bir ildə 90% və ya 1,85 milyard manat azalıb.

Belə ki, 2024-ci ilin yanvar-avqust aylarında  şirkətin (“Azfinance” adlanırdı) dövriyyəsi 2,05 milyard manat təşkil edib. Bağlanan əqdlərin sayı isə 1626-dan 84-ə enib. 

Bu dövrdə investisiya şirkətinin birja əməliyyatlarının 12,9 milyon manatı dövlət istiqrazlarının, 178,08 milyon manatı repo əməliyyatlarının, 8,28 milyon manatı isə korporativ istiqazların payına düşüb. Şirkət səhmlər və AMB notları üzrə əməliyyat aparmayıb. 

Qeyd edək ki, “CFI Financial İnvestisiya” bu ilin ilk səkkiz ayında daxili birjada dövriyyəsi ən çox azalan şirkət olub. 

İnvestisiya şirkəti bu il 3 milyon manat “maya” qoyulsa da, özünü doğrultmayıb və ilin ilk yarısında 2,95 mln. manat zərər edib. 

Xatırladaq ki, "AzFinance Investment Şirkəti" ötən ilin avqust "CFI Financial Group"a satıldıqdan sonra rebrendinqini elan edib və "CFI Financial İnvestisiya Şirkəti"nə çevrilib. Şirkətə böyük maya qoyulduğu deyilsə də, hələlik sələfinin performansını göstərmək mümkün olmayıb.

Nara