Ərəblərin “CFI Financial İnvestisiya”ya yatırdığı 3 milyon zərərə gedib? - Cəmi 469 manat gəlir

“CFI Financial İnvestisiya Şirkəti” 2025-ci ilin ilk yarısında böyük həcmdə zərər edib.
 
Valyuta.az xəbər verir ki, investiya şirkətinin zərəri sələfi “AzFinance”la müqayisədə 3,5 dəfə artaraq 2,95 milyon manata yüksəlib.

Belə ki, 2024-cü ilin avqustunda BƏƏ mərkəzli CFI Financial Group Azərbaycanda fəaliyyət göstərən “AzFinance İnvestisiya Şirkəti”ni alaraq “CFI Financial İnvestisiya Şirkəti” adı ilə yenidən brendləşdirib və şirkətdə payı 90% təşkil edib. Satınalmadan sonra şirkətin nizamnamə kapitalı 1,55 milyon manatdan 4,55 milyon manata yüksəlib. Başqa sözlə, səhmdarlar investisiya şirkətinə 3 milyon manat “maya qoyub”.

Lakin 2025-ci ilin ilk yarısının maliyyə göstəriciləri sərmayənin gözlənilən nəticəni vermədiyini göstərir. Şirkətin gəlirləri 2024-cü ildə 499 min manat idisə, 2025-ci ildə cəmi 469 manata düşüb. Əksinə, xərclər 852 min manatdan 2,95 milyon manata yüksəlib. Bu isə zərərin nə az, nə çox 3,5 dəfə  və ya 2 mln. manatdan çox artması deməkdir. Zərərin “şişməsi” marketinq xərclərinin kəskin artması ilə bağlı olub - bu istiqamətdə 1,65 milyon manat xərclənib. Bundan başqa, işçi heyəti ilə bağlı xərclər 676,6 min manat, digər əməliyyat xərcləri isə 553,4 min manat təşkil edib. 2024-cü ildə isə bu istiqamətlər üzrə ümumi xərclər daha az - 852 min manat idi.

Paralel olaraq ilk altı ayda investisiya şirkəti kiçilib. Belə ki, cəmi aktivləri ilin əvvəlindəki 8,7 milyon manatdan 6,23 milyon manata düşüb. Bununla belə, cəmi öhdəlikləri  2,95 milyon manatdan 3,31 milyon manata yüksəlib.

Nara