Dünyanın ən sürətli traktoru: "Formula 1" mühəndisliyi ilə əldə olunan rekord

Ağır, ləng və yalnız tarlalar üçün nəzərdə tutulmuş texnika kimi tanınan traktor anlayışı britaniyalı mühəndislərin qeyri-adi layihəsi ilə tamamilə yeni məna qazanıb. 

Valyuta.az xəbər verir ki, "JCB" şirkəti ənənəvi traktor konsepsiyasını dəyişərək drag yarışlarının sürət fəlsəfəsini kənd təsərrüfatı texnikasına tətbiq edib. "Fastrac Two" adlanan xüsusi hazırlanmış model saatda 247,4 kilometr maksimal sürətə çataraq Ginness Rekordlar Kitabına "dünyanın ən sürətli traktoru" kimi daxil edilib.

Rekordun arxasında dayanan sürət həvəsi

Beynəlxalq qaydalara əsasən, külək və digər xarici amillərin təsirini neytrallaşdırmaq üçün rekord cəhdi zamanı nəqliyyat vasitəsi bir kilometrlik məsafəni iki əks istiqamətdə qət etməli olub. Sınaqların yekununda "Fastrac Two" orta hesabla saatda 217,5 kilometr sürət göstəricisi əldə edib.

Rekord Böyük Britaniyanın York şəhəri yaxınlığındakı "Elvington" hava limanında qeydə alınıb. Layihənin sınaq pilotu motosiklet yarışçısı və peşəkar mexanik Qay Martin olub.

Layihə həmin il saatda 166,7 kilometr sürətlə müəyyən edilmiş əvvəlki dünya rekordunun yenilənməsi məqsədilə hazırlanıb.

"Formula 1" texnologiyası tarlalara gətirildi

Bir traktoru bu qədər yüksək sürətə çatdırmaq adi modifikasiya deyil, genişmiqyaslı mühəndislik layihəsi tələb edib. Komanda əsas kimi seriya istehsalı olan "JCB Fastrac 8000" modelini seçsə də, onun aerodinamik quruluşu tamamilə yenidən işlənib.

Traktorların iri və yüksək hava müqavimətinə malik konstruksiyasını təkmilləşdirmək üçün "Williams Advanced Engineering" şirkətinin mütəxəssisləri və "Formula 1" mühəndisi Rob Smedli layihəyə cəlb olunub. Nəticədə maşının hava müqaviməti təxminən 10 faiz azaldılıb.

Çəkinin azaldılması məqsədilə də radikal dəyişikliklər həyata keçirilib. Təxminən 8,5 ton ağırlığında olan standart gövdə karbon lifindən və alüminiumdan hazırlanmış hissələrlə əvəzlənərək ümumi çəki 5 tona qədər endirilib.

7,2 litrlik altısilindrli dizel mühərriki mühəndislik təkmilləşdirmələri nəticəsində 1000 at gücündən artıq güc hasil edəcək səviyyəyə çatdırılıb.

Təhlükəsizlik məqsədilə avtomobilə xüsusi əyləc sistemi və əlavə olaraq əyləcləmə paraşütü quraşdırılıb. Bununla belə, sınaq pilotu Qay Martin bütün sistemlərin qüsursuz işləməsi sayəsində traktoru dayandırmaq üçün paraşütdən istifadə etməyə ehtiyac duymayıb.

Paşa Məmmədli