Bank olmayan kredit təşkilatı filiallar üçün müdirlər axtarır

"International BOKT" filiallarında çalışmaq istəyən mütəxəssislər üçün bir sıra vakansiyalar elan edib.

Valyuta.az xəbər verir ki, Bakı, Sumqayıt, Cəlilabad, Gəncə, Qazax, Sabirabad və Ağdaş filiallarında filial müdiri və filial müdiri müavini vəzifələri üzrə işçi qəbulu aparılır.

Bununla yanaşı, Bakıda açılacaq yeni filiallar üçün filial müdiri və satış üzrə qrup rəhbəri vakansiyaları da elan olunub.

Filial müdiri vəzifəsinə qəbul olunacaq şəxslər filialın gündəlik fəaliyyətinin səmərəli təşkil edilməsi və idarə olunması, satış planlarının hazırlanması və icrası, kredit portfelinin keyfiyyətinə nəzarət, problemli kreditlərin idarə olunması, yeni müştərilərin cəlb edilməsi, filial əməkdaşlarının işinin koordinasiyası və peşəkar inkişafının təmin edilməsi, həmçinin maliyyə və əməliyyat göstəriciləri üzrə hesabatların hazırlanaraq rəhbərliyə təqdim edilməsinə cavabdeh olacaqlar.

Namizədlərdən maliyyə, iqtisadiyyat, idarəetmə və ya əlaqəli sahə üzrə ali təhsil, bank və ya bank olmayan kredit təşkilatında minimum 3 il, rəhbər vəzifədə isə ən azı 1 il iş təcrübəsi tələb olunur. Həmçinin kredit məhsulları, kredit riskləri və satış prosesləri üzrə biliklər, liderlik və komanda idarəetmə bacarıqları, analitik düşünmə və qərarvermə qabiliyyəti, Azərbaycan dilində sərbəst danışıq və yazı bacarığı, eləcə də MS Office proqramlarında sərbəst işləmək bacarığı üstünlük hesab edilir.

Şirkət tərəfindən rəqabətqabiliyyətli əmək haqqı, bonus və motivasiya sistemi, əmək qanunvericiliyinə uyğun rəsmiləşdirmə, peşəkar inkişaf və karyera yüksəlişi imkanları təklif olunur. İş qrafiki bazar ertəsindən cümə gününədək saat 09:00–18:00-dır.

Maraqlanan namizədlər CV-lərini [email protected] elektron poçt ünvanına göndərə bilərlər. Elektron məktubun mövzu hissəsində müraciət edilən vəzifə və filialın adı qeyd olunmalıdır. Məsələn, "Filial müdiri – Bakı" və ya "Filial müdiri müavini – Qazax".

Qeyd edək ki, "International BOKT"un baş ofisi üçün onlayn satış və telemarketinq mütəxəssisi vəzifəsi üzrə də namizəd qəbulu davam edir.

Sərvanə Rəmixanova