"Azər Türk Bank"ın mənfəəti azalıb

Azər Türk Bank 2025-ci ilin IV rübünü 10 milyon 131 min manat xalis mənfəətlə başa vurub.

Valyuta.az xəbər verir ki, bu, ötən ilin eyni dövrü ilə müqayisədə 11 milyon 177 min manat və ya 52,5% azdır.

Faiz gəlirləri 2025-ci ildə 126 milyon 760 min manat təşkil edib. Bu göstərici əvvəlki illə müqayisədə 19 milyon 539 min manat və ya 18,2% artıb. Lakin gəlirlərlə paralel olaraq faiz xərcləri daha sürətlə artaraq 64 milyon 855 min manata çatıb. Bu, illik müqayisədə 35,8% artımdır.

Xərclərin strukturunda əsas yük depozitlər üzrə faizlərə düşür. Bu istiqamətdə ödənişlər 31,9% artaraq 55 milyon 871 min manata qalxıb. Cəlb edilmiş kreditlərə görə faizlər isə 11,7% artaraq 4 milyon 819 min manata çatıb.

Bununla yanaşı, qeyri-faiz xərcləri də artmaqda davam edib. 2025-ci ilin IV rübündə bu xərc qrupu 78 milyon 329 min manat təşkil edib ki, bu da illik müqayisədə 17,6% artım deməkdir.

Bankın kredit portfeli üzrə göstəricilərdə isə azalma müşahidə olunub. 2025-ci ilin sonuna müştərilərə verilmiş kreditlər 787 milyon 352 min manat təşkil edib. Bu, ötən ilin eyni dövrü ilə müqayisədə 12 milyon 541 min manat və ya 1,6% azdır.

Kredit portfelinin əsas istiqaməti olan biznes kreditləri üzrə göstəricilər də geriləyib. 2024-cü ildə 311 milyon 817 min manat olan bu göstərici 2025-ci ildə 252 milyon 503 min manata düşüb. Nəticədə biznes kreditləri 59 milyon 314 min manat və ya 19,0% azalıb. 

Öhdəliklər üzrə göstəricilərə gəldikdə isə, Mərkəzi Bank və dövlət fondları qarşısında olan öhdəlikləri artaraq 205 milyon 958 min manata (7,5% artım) çatıb. Əvəzində, kredit təşkilatları və digər maliyyə institutları qarşısında öhdəliklər 13,9% azalaraq 243 milyon 891 min manata düşüb.

Mayya Hüseynova