“Unibank”ın mənfəəti artıb, lakin faiz xərcləri marjanı sıxışdırır

2025-ci ilin yekunlarına görə, “Unibank” ili 25,8 milyon manat xalis mənfəətlə başa vurub.

Valyuta.Az-ın bankın hesabatına istinadən verdiyi xəbərə görə, bu, əvvəlki illə müqayisədə 5,4 milyon manat və ya 26,4% artım deməkdir.

Bankın maliyyə göstəricilərində artıma əsasən qeyri-faiz gəlirləri səbəb olub. Bu kateqoriya üzrə gəlirlər 19,5% artaraq 146,3 milyon manata, komissiya gəlirləri isə 20,9% artaraq 126,9 milyon manata yüksəlib.

Eyni zamanda bankın xalis faiz gəliri 143,1 milyon manat təşkil edib. Ümumi faiz gəlirləri 251,2 milyon manat, faiz xərcləri isə 101,9 milyon manata çatıb. Sonuncunun daha sürətli artımı bankın resurs bazasının bahalaşdığını göstərir və bu, gələcəkdə faiz marjası üçün təzyiq yarada bilər.

Əməliyyat xərclərində də artım müşahidə olunub: qeyri-faiz xərcləri 5,7% artaraq 219,5 milyon manata çatıb. Əmək haqqı, amortizasiya və digər xərclərin ümumi artımı isə 11,9 milyon manat olub. Bu tendensiya gələcək dövrlərdə mənfəətin davamlılığı üçün risk yarada bilər.

Bütün bu dəyişikliklər fonunda bankın əməliyyat mənfəəti 69,9 milyon manata yüksəlib. Lakin mümkün risklərə qarşı 35,3 milyon manat ehtiyat yaradılıb.

Aktivlər 2,1 milyard manatı keçib

2025-ci ilin sonuna “Unibank”ın cəmi aktivləri 2 milyard 132,9 milyon manat təşkil edib ki, bu da illik müqayisədə 21,2% artım deməkdir. Aktivlərin artımına əsasən kredit portfeli təsir edib. Bankın xalis kreditləri 14,6% artaraq 1 milyard 276,2 milyon manata çatıb.

Kredit portfelində ən yüksək artım 26,9% ilə biznes kreditləri üzrə qeydə alınıb. İstehlak və ipoteka kreditləri müvafiq olaraq 4,6% və 3,8% artıb. Bu dinamika bankın korporativ seqmentdə genişləndiyini göstərsə də, risk yükünün artması ehtimalını da gücləndirir.

Nağd vəsaitlərin həcmi 63,5% artaraq 385,4 milyon manata çatıb. Bu göstərici likvidlik baxımından müsbət sayılsa da, ehtiyatlı strategiya və ya bazarda artan risklərin göstəricisi kimi də dəyərləndirilə bilər.

Öhdəliklərdə artım və bahalı resurs riski

Bankın öhdəlikləri 1 milyard 940,1 milyon manata yüksəlib ki, bu da 21,8%-lik artım deməkdir. Əsas artım mənbələri depozitlər və digər maliyyə institutları qarşısındakı borclardır.

Depozit portfeli 14,4% artaraq 1 milyard 377,9 milyon manata çatıb. Burada əsas pay fiziki şəxslərin depozitlərinə düşür.

Digər tərəfdən, bankın maliyyə institutları qarşısındakı öhdəlikləri 46,7% artaraq 306,6 milyon manata çatıb. Subordinasiya borcları isə 85 milyon manatı keçib. Bu göstəricilər bankın böyümə prosesində bahalı resurslardan istifadə etdiyini və bu səbəbdən faiz xərclərinin növbəti dövrlərdə arta biləcəyini göstərir.

Kapital artımı aktivlərə nisbətən zəifdir

Bankın cəmi kapitalı 192,8 milyon manat təşkil edir. Baxmayaraq ki, bu göstərici müsbət dinamikanı əks etdirir, aktivlərin 21%-lik artımı fonunda kapital artımının daha zəif olması gələcəkdə kapital adekvatlığına dair risklər doğura bilər.

Ümumilikdə isə, 2025-ci ildə “Unibank” xalis mənfəətini artırmağa nail olub. Lakin artan faiz xərcləri, əməliyyat xərcləri və maliyyə institutlarına qarşı öhdəliklərin genişlənməsi bankın rentabellik göstəriciləri üçün təzyiq yaradır. Bu şəraitdə komissiya və qeyri-faiz gəlirlərinin stabil artımı bankın əsas dayaq nöqtəsinə çevrilir.

Aydın