Startap rəhbəri gəlir rəqəmləri barədə yalan danışdığını etiraf etdi

ABŞ-da fəaliyyət göstərən "Cluely" startapının həmtəsisçisi və baş icraçı direktoru Roy Li şirkətin gəlirləri ilə bağlı əvvəl açıqladığı məlumatların doğru olmadığını etiraf edib.

Valyuta.az xəbər verir ki, Roy Li sosial şəbəkə X platformasında paylaşım edərək ötən il "TechCrunch"a açıqladığı 7 milyon dollarlıq illik gəlir göstəricisinin həqiqətə uyğun olmadığını bildirib və bunu “açıq yalan” adlandırıb.

Qeyd edək ki, "Cluely" 2025-ci ildə diqqət çəkən startaplardan biri olub. Şirkət istifadəçilərə video zənglər zamanı gizli şəkildə sualların cavablarını axtarmağa imkan verən proqram hazırlaması ilə məşhurlaşmışdı. Bu layihə hətta şirkətin qurucularının universitetdə problem yaşamasına səbəb olmuşdu.

Startap daha sonra investorların diqqətini çəkərək "Abstract Ventures" və "Susa Ventures" fondlarından 5,3 milyon dollar ilkin investisiya, daha sonra isə "Andreessen Horowitz" fondundan 15 milyon dollar Series A investisiyası cəlb edib.

Hazırda "Cluely" fəaliyyət istiqamətini dəyişərək özünü süni intellekt əsaslı görüş qeydləri hazırlayan platforma kimi təqdim edir. Bununla yanaşı, şirkət rəhbərinin gəlir rəqəmləri ilə bağlı etirafı startapın əvvəlki açıqlamalarının etibarlılığı ilə bağlı müzakirələrə səbəb olub.