Agentlik “Azərişıq”da pozuntular aşkarlayıb - Məcburi göstəriş verilib

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi “Azərişıq” ASC-yə icrası məcburi göstəriş verib.

Valyuta.az xəbər verir ki, gentlikdən bildirilib ki, vətəndaş müraciətləri, eləcə də Enerji Məsələləri Tənzimləmə Agentliyindən (EMTA) daxil olmuş məlumatlar əsasında “Azərişıq” ASC-nin fəaliyyəti ilə bağlı araşdırma aparılıb.

Araşdırma zamanı elektrik enerjisi təchizatının təşkili, istehlakçılarla hesablaşmaların aparılması və bildirişlərin təqdim olunması proseslərində sahəvi qanunvericiliyin tələblərinə tam əməl edilməsinin vacibliyi müəyyən edilib. Həmçinin elektrik enerjisi təchizatının dayandırılması zamanı qanunvericilikdə nəzərdə tutulan müddətlərə riayət olunmasının zəruriliyi vurğulanıb.

Bununla əlaqədar olaraq, Agentlik tərəfindən “Azərişıq” ASC-yə elektrik enerjisi təchizatının qanunvericiliyin tələblərinə uyğun həyata keçirilməsi, istehlakçılara təqdim edilən hesablarda mövcud qalıq borcun göstərilməsi və yazılı xəbərdarlıqlarda müvafiq dəyişikliklərin edilməsi ilə bağlı icrası məcburi göstəriş verilib.

Bundan əlavə, rəqabət qanunvericiliyinin tələblərinin pozulmasında iştirak etmiş “Azərişıq” ASC-nin Cənub, Şimal-Qərb, Şirvan, Sumqayıt və Yasamal Regional (Rayon) Enerji Təchizatı və Satışı İdarələrinin rəisləri, eləcə də həmin qurumların enerji satışı üzrə müavinlərinə maliyyə sanksiyası tətbiq olunub.

Agentlik qeyd edib ki, hazırda “Azərişıq” ASC tərəfindən elektrik enerjisi təchizatında qanunvericiliyin tələblərinə riayət olunması və abonentlərlə işin daha effektiv təşkili istiqamətində zəruri tədbirlər görülür.