Bu ölkə “qızıl viza” proqramı tətbiq edəcək

Rumıniya parlamentində xarici sərmayələrin cəlbinə yönəlmiş “qızıl viza” proqramına dair qanun layihəsi müzakirəyə çıxarılıb.

Valyuta.az xəbər verir ki, layihəyə əsasən, Avropa İttifaqına daxil olmayan ölkələrin vətəndaşlarına Rumıniyada ən azı 400 min avro məbləğində sərmayə yatırmaq şərtilə 5 illik müvəqqəti yaşayış icazəsi veriləcək.

Sərmayə dövlət istiqrazları, daşınmaz əmlak və ya şirkət səhmlərinə yönəldilə bilər. Əsas şərtlərdən biri isə yatırılan vəsaitin ölkədə azı 5 il müddətində saxlanmasıdır.

Qeyd olunur ki, proqramda iştirak etmək istəyən şəxslər vəsaitin qanuni mənbədən əldə olunduğunu sübut etməli, cinayət keçmişi olmamalı və milli təhlükəsizlik üçün risk yaratmamalıdırlar. 

Qanun layihəsi hazırda ilkin mərhələdədir. Sənəd qəbulu həyata keçirilsə, Rumıniya 2026-cı ildən “qızıl viza” proqramını tətbiq edə bilər.