6G həyatımızda nələri dəyişdirəcək?

Mobil şəbəkə texnologiyasının inkişafı 3G-dən 4G-yə və oradan da əsasən 5G-yə çatıb.İndi isə gözlənildiyi kimi, üfüqdə 6G görünür. Lakin əvvəlki nəsillərdən fərqli olaraq, 6G istehlakçı həyəcanından çox telekommunikasiya sənayesi və şəbəkə infrastrukturu müzakirələrinin mərkəzində dayanır.

Valyuta.az xəbər verir ki, çip istehsalçısı "Qualcomm"un baş direktoru Kristiano Amon Lissabonda keçirilən "Web Summit" tədbirindəki çıxışında ABŞ-da 2030-cu illərin əvvəlində istifadəyə verilməsi planlaşdırılan 6G şəbəkələrinin həyəcanverici imkanlar təqdim edə biləcəyini bildirib və “6G süni intellekt üçün hazırlanıb” deyib. 

O qeyd edib ki, yeni şəbəkə yalnız bağlantı sürətini artırmaqla kifayətlənməyəcək, həm də ətrafı “qavrayaraq” bizim adımıza fəaliyyət göstərməyə hazırlaşan AI agentlərinə kontekstuallıq verəcək.

Bu diqqətçəkici qeyddən sonra Amon, 6G-nin adi bir smartfon istifadəçisinə hansı yeniliklər gətirəcəyi ilə bağlı əlavə məqamlar açıqlayıb.

Amonun sözlərinə görə, hər yeni şəbəkə nəsli tamamilə fərqli bir istifadəçi təcrübəsinin qapısını açıb. 2G mobil telefonları hər kəs üçün əlçatan edib; 3G telefonları internetə bağlayıb; 4G mobil cihazları kompüterə çevirib; 5G isə kritik əlaqə və limitsiz məlumat imkanlarını təmin edib. Bəs 6G mövcud texnologiyaların fövqündə bizə nə təqdim edəcək?

Daha sürətli bağlantı və daha aşağı gecikmə 6G-nin əsas üstünlüklərindən biridir. Lakin Amon bildirib ki, AI dəstəyi ilə işləyən cihazlarla qarşılıqlı əlaqənin dəyişməsi fonunda bu xüsusiyyətlər daha da önəm qazanacaq.

ChatGPT, "Gemini" və "Copilot" kimi AI əsaslı çatbotlarının təməlində duran böyük dil modellərinin ən böyük üstünlüklərindən biri təbii danışığı anlaya bilmələridir. Bu isə səsi AI agentləri ilə ünsiyyət üçün ən asan və ən təbii vasitəyə çevirir.

Amon deyib: “Səs yenidən önəm qazanacaq. Agentlərə və müxtəlif cihazlara qoşulmaq üçün səsdən istifadə edəcəyik, bu isə cavab müddətini daha da yaxşılaşdıracaq və daha sürətli əlaqə təmin edəcək”.

6G “davamlı qavrayan şəbəkə”ni işə salacaq

"Qualcomm" müstəqil şəkildə bizim adımıza vəzifələri yerinə yetirə bilən AI agentlərinin potensialını erkən müdafiə edən şirkətlərdəndir. Şirkətin çipləri artıq telefonlardan tutmuş geyilə bilən cihazlara və avtomobillərə qədər geniş sahədə agent əsaslı təcrübələri dəstəkləyir.

Əgər agentlərin ödəmələr etmək və ya müştəriyə e-poçt göndərmək kimi tapşırıqları düzgün icra etməsi üçün səsli qarşılıqlı əlaqəyə bel bağlayırıqsa, tərcümədə heç bir məqamın itirilməməsi üçün tam fasiləsiz bağlantı həyati əhəmiyyət daşıyır. Amonun fikrincə, 6G məhz bu yerdə fərq yaradacaq.

Amon deyib: “Qarşılıqlı əlaqədə olduğumuz cihazlar nə dediyimizi, nə eşitdiyimizi və nə gördüyümüzü anlayacaqç 6G kontekst təmin edəcək”.

Ətrafımızı əhatə edən “davamlı qavrayan şəbəkə” sayəsində agentlər ətrafda baş verənlərə əsaslanaraq nə edəcəyimizi və nəyə ehtiyac duyacağımızı proqnozlaşdıra biləcək.

Amon “Qorxuducu səsləndiyini bilirəm” desə də, 6G şəbəkəsinin konteksti anlama qabiliyyətinin AI agentlərinin işləməsi üçün açar rol oynayacağını vurğulayıb.

ABŞ-da 6G şəbəkəsinin istifadəyə verilməsinə ən azı beş il qalsa da və AI sürətlə inkişaf etməyə davam etsə də, bu iki texnologiya birləşəndə nə baş verəcəyini tam proqnozlaşdırmaq çətindir. Lakin 6G-nin bəziləri hələ icad edilməmiş ola bilən tamamilə yeni təcrübələrə güc verəcəyi dəqiqdir.

Paşa Məmmədli