TikTok-da yeni istifadəçilərə göstərilən videoların 60 faizə yaxını süni intellekt məzmunudur

Video montaj platforması “Kapwing” in araşdırmasına görə, TikTok-un yeni istifadəçilərə təqdim etdiyi məzmunun böyük hissəsi süni intellekt tərəfindən yaradılmış aşağı keyfiyyətli videolardan ibarətdir.

Valyuta.az xəbər verir ki, “Kapwing” 20 məşhur kateqoriya üzrə 10 742 TikTok videosunu, həmçinin yeni hesabların “For You” lentində nümayiş olunan ilk 500 videonu təhlil edib. Araşdırma nəticəsində məlum olub ki, həmin videoların 294-ü süni intellekt vasitəsilə hazırlanmış aşağı keyfiyyətli məzmundur.

Ən çox təsirlənən sahə uşaqlar üçün nəzərdə tutulan məzmundur. TikTok-un uşaq kateqoriyasındakı videoların 57 faizi “AI slop” hesab olunub. “#CartoonKids” həştəqində bu göstərici 97 faiz, “#cartoons” və “#babysong” həştəqlərində 83 faiz, “#forkids” həştəqində isə 79 faiz təşkil edib.

Digər tərəfdən, fitnes, musiqi və moda kateqoriyalarında süni intellekt məzmununun payı iki faizdən aşağı olub.

Çikaqo Universitetinin pediatriya professoru Dana Suskind bu tendensiyanı “sənaye miqyasında körpələr üçün süni intellekt dezinformasiyası” kimi qiymətləndirib.

“Kapwing” bildirir ki, TikTok alqoritmi istifadəçilərin maraqlarını müəyyənləşdirməzdən əvvəl tövsiyələrə əsasən ümumi ehtimallara söykənir. Nəticədə süni intellekt məzmunu yeni istifadəçilərin platforma ilə bağlı ilk təəssüratına çevrilir.

Qeyd edək ki, tədqiqatın nəticələri insan ekspertlərinin qiymətləndirmələri əsasında hazırlanıb və şirkətin insan tərəfindən yaradılmış məzmunun təşviqində kommersiya marağı mövcuddur.

Rəfiqə Abdin