Süni intellektlə şəkil hazırlamaq üçün ən güclü 10 alət

2025-ci ildə süni intellekt yalnız kod yazmaqla və ya məlumat analiziylə kifayətlənmir. O artıq yaradıcılığın da ayrılmaz parçasına çevrilib.

Valyuta.az xəbər verir ki, "Dream Machine", "Sora", "Midjourney", "Leonardo AI" və digər qabaqcıl platformalar portretdən animasiyaya, məhsul şəkillərindən loqo dizaynına qədər geniş spektrdə yaradıcı imkanlar təqdim edir. Bu alətlər funksionallıq, vizual keyfiyyət və istifadə rahatlığı baxımından fərqlənir və dizaynerlərdən marketinq mütəxəssislərinə qədər bir çox sahədə çalışanların əsas seçiminə çevrilib.

1. Dream Machine (Luma AI)

720 pikselə qədər təsvir yarada bilən "Dream Machine" istək və referens şəkillər əsasında işləyir. Mövcud şəkilləri dəyişmək və video hazırlamaq funksiyası mövcuddur. Pulsuz versiyada filigranlı və məhdud istifadə imkanları var. Ödənişli planlar ayda 9.99 dollardan başlayır və 3200 kredit təqdim olunur.

2. Higgsfield

Moda sahəsində realist şəkilləri və effektləri ilə tanınan "Higgsfield", “Soul”, “Flux Kontext Max” və “GPT-4o” modellərindən istifadə edir. Selfie, "TikTok" və "İnstagram" estetikasında şəkillər yarada bilir. Platforma həmçinin video istehsalını da dəstəkləyir. Yüksək keyfiyyətli təsvirlər əlavə kreditlə əldə edilir.

3. Ideogram

Bu platforma portret, məhsul, loqo və hətta geyim üzərində tətbiq ediləcək dizaynlar yaratmağa imkan verir. Abunəlik planları 8–60 dollar arası dəyişir, korporativ planlar isə 20 dollardan başlayır.

4. Imagen 4 (Google)

2K-ə qədər keyfiyyətdə şəkil yarada bilən Imagen 4 su damcıları, toxumalar və tük kimi incə detalların yüksək dəqiqliklə təsvirində fərqlənir. Google AI Studio, Gemini və Whisk üzərindən istifadə edilir və həm real, həm də abstrakt şəkillər təqdim edir.

5. KlingAI

“Kolors” model seriyası və “Elements” xüsusiyyəti ilə şəkillərə obyekt, səhnə və üslub əlavə etmək mümkündür. Platforma həmçinin virtual geyim sınağı funksiyası təqdim edir. Kreditlərin istifadə müddətinə diqqət yetirilməlidir.

6. Leonardo AI

FLUX, Lucid və GPT modellərini dəstəkləyən bu platforma müxtəlif ölçü və üslublarda şəkil yaratmağa imkan verir. Bokeh, skeç və minimalist üslublar mövcuddur. Abunəlik planları ayda 12–60 dollar arası dəyişir. Pulsuz versiya və video funksiyası da mövcuddur.

7. Midjourney

Yaradıcı və fərdi üslubda şəkil hazırlamaq istəyənlər üçün ideal platformadır. “Niji” və “Style Tuner” modları, eləcə də geniş redaktə imkanları ilə seçilir. Aylıq 10–60 dollar arasında dəyişən planlar təklif olunur. Yeni təqdim olunan “V1” modeli ilə video funksiyasına da keçid edilib.

8. Playground

Poster, loqo, tişört və stiker dizaynı üçün də əlverişlidir. İstifadəçilər istək əsasında şəkil yarada, istədikləri vizualı platformaya yükləyərək redaktə edə bilərlər. Pulsuz planla məhdud sayda dizayn təqdim edilir, premium paketlər isə 15 dollardan başlayır.

9. Reve

"Reve"in “Image 1.0” modeli uzun və detallı istəkləri dəqiqliklə emal edir. Redaktə qabiliyyəti "GPT-4o" və "Midjourney" ilə müqayisədə zəif olsa da, müxtəlif variasiyalar yaratmaq mümkündür. Kredit əsaslı çevik qiymət sistemi təklif edir.

10. Sora (OpenAI)

"GPT-4o" ilə dəstəklənən "OpenAI"nin "Sora" platforması həm şəkil, həm də video yaradır. Mart ayında istifadəyə verilən bu funksiya ilə bir həftədə 700 milyondan çox şəkil hazırlanıb. 2 Apreldən etibarən isə funksional imkanlar pulsuz istifadəçilərə də açılıb. Studio Ghibli üslubundakı şəkillər sayəsində "ChatGPT"nin istifadəçi sayı ikiqat artıb.