"Siri"də böyük süni intellekt yeniləməsi yenidən təxirə salındı

“Apple” 2024-cü ildə “Apple Intelligence” platformasını təqdim edərkən ən çox diqqət çəkən elanlardan biri tamamilə yenilənmiş və daha güclü “Siri” olmuşdu. Lakin aradan keçən təxminən bir il yarım ərzində “yeni dövr” kimi təqdim olunan “Siri”nin buraxılış tarixi dəfələrlə təxirə salınıb.

Valyuta.az xəbər verir ki, yeni “Siri”nin mart ayında yayımlanması planlaşdırılan iOS 26.4 yeniləməsi ilə istifadəyə veriləcəyi düşünülürdü. Lakin son məlumatlara əsasən, dəyişikliklər mərhələli şəkildə təqdim olunacaq.

Məlumata görə, bəzi funksiyalar may ayında çıxacaq iOS yeniləməsinə keçirilib, hətta müəyyən yeniliklərin sentyabr ayında təqdim olunması gözlənilən iOS 27 versiyasına qədər gecikə biləcəyi bildirilir.

Gecikmənin səbəbi test mərhələsində ortaya çıxan texniki problemlərlə əlaqələndirilir. Qeyd olunur ki, “Apple” proqram təminatını sınaqdan keçirərkən müxtəlif çətinliklərlə üzləşib və buna görə də buraxılış tarixini bir daha irəli çəkmək məcburiyyətində qalıb.

Edilən dəyişikliklərlə birlikdə “Siri”nin texnologiya dünyasında geniş yayılmış böyük dil modeli əsaslı çatbotlara daha çox bənzəyəcəyi bildirilir. Bu transformasiya baş verərsə, istifadəçilərin “iPhone” və ya “MacBook” cihazlarında ayrıca ChatGPT və ya “Claude” tətbiqini açmasına ehtiyac qalmaya bilər. Bunun əvəzinə birbaşa “Siri” ilə ünsiyyət kifayət edəcək.

Bundan əlavə, “Siri”nin infrastrukturunda “Google Gemini” modelindən istifadə oluna biləcəyi də iddialar arasındadır. Bu isə “Apple”ın rəqəmsal köməkçisində xarici mənbəyə aid güclü süni intellekt modelindən yararlana biləcəyi anlamına gəlir.

“Apple” tərəfindən məsələ ilə bağlı hələlik rəsmi açıqlama verilməyib. Görünən odur ki, yeni nəsil “Siri” üçün bir qədər də səbirli olmaq lazım gələcək. “Siri”nin məhsul menecerləri üçün də prosesin kifayət qədər çətin keçdiyi qeyd olunur. Gözlənti davam edir.

Paşa Məmmədli