"Kredit ödənişini gecikdirməyinizi banklar 10 il sistemdə görür"

Vətəndaş bankdan kredit götürüb, bir müddət ödənişlərini vaxtında etsə də, sonradan maddi problemləri olduğu ödənişlərini vaxtında edə bilməyib və borcu yığılıb. Sonra o, bütün borcunu bağlayıb. İndi "Findoc"dan kredit skorunu (ingilis dilindən tərcümədə “score” “xal”, “qiymət” mənasını verir, təcrübədə tərcümə olunmadan “skor” kimi istifadə edilir) yoxlayır və nəticə pis göstərir (ən aşağı skor). Vətəndaş bilmək istəyir ki, kredit skorunu necə yaxşılaşdıra bilər? Ümumilikdə, kredit tarixçəsi pis olduqda, banklarda həmin şəxsə kredit verməkdən çəkinir. 

Sual yaranır ki, kredit tarixçəmizi necə yaxşılaşdıra bilərik?

Bank məsələləri üzrə ekspert Əkrəm Həsənov Valyuta.az-a bildirib ki, kredit tarixçəsini yaxşılaşdırmağın əsas yolu götürülmüş kredit öhdəliklərini vaxtında və tam şəkildə yerinə yetirməkdir:

"Kredit tarixçəsi maliyyə intizamını əks etdirən rəsmi məlumat bazasıdır və artıq baş vermiş hadisələri dəyişmək mümkün deyil. Vaxtında ödənişlə bağlı problem yaşanması o demək deyil ki, şəxsə gələcəkdə kredit verilməsi tamamilə mümkünsüzdür. Kredit təşkilatları - banklar, bank olmayan kredit təşkilatları və digər kreditorlar - qərar qəbul edərkən riskləri qiymətləndirir və daha ehtiyatlı davranırlar. Kredit tarixçəsinin məqsədi də potensial kreditorları borcalanın əvvəlki öhdəlikləri barədə məlumatlandırmaqdır. Yəni, qərar vermək səlahiyyəti hər bir qurumun özünə məxsusdur. Təcrübədə bir çox hallarda mənfi tarixçə kreditin rədd edilməsi ilə nəticələnə bilər. Lakin bu vəziyyətdən çıxış yolları mövcuddur. Məsələn, girov təqdim etmək və ya zamin cəlb etmək kredit almaq imkanlarını artıra bilər. Bundan əlavə, yeni götürülən kreditlərin vaxtında ödənilməsi zamanla kredit tarixçəsinin müsbət istiqamətdə formalaşmasına səbəb olur".

"Qeyd etmək lazımdır ki, kredit tarixçəsindəki məlumatlar 10 il ərzində sistemdə görünəcək. Bu müddət ərzində həm əvvəlki gecikmələr, həm də sonradan öhdəliklərin vaxtında yerinə yetirilməsi görünür. Nəticə etibarilə, maliyyə intizamının bərpası və davamlı şəkildə qorunması kredit tarixçəsinin yaxşılaşmasında əsas amildir", - deyə ekspert əlavə edib.

Mayya Hüseynova