Agentlik 9 milyona hazır yeməklər alacaq

“Sosial Xidmətlər Agentliyi” Publik Hüquqi Şəxsinin elan etdiyi tenderin qalibi məlum olub.

Valyuta.az xəbər verir ki, müsabiqənin qalibi fiziki şəxs Ziyafət İsa oğlu Fərzəliyev olub.

Qalib podratçı agentliyin tabeliyində fəaliyyət göstərən sosial xidmət müəssisələrinin sakinləri üçün hazır yeməyin satın alınmasını həyata keçirəcək. Layihənin icrası üçün 9 milyon 179 min 336 manat vəsait ayrılacaq.

Qeyd edək ki, tenderin ehtimal olunan qiyməti 10 milyon 344 min 884 manat təşkil edib. Beləliklə, bağlanmış müqavilə məbləği proqnozlaşdırılan dəyərdən aşağı olub.

Bu, tərəflər arasında imzalanan ilk müqavilə deyil. Belə ki, 2024-cü ilin dekabr ayında da Ziyafət İsa oğlu Fərzəliyev 9 milyon 308 min 116,12 manat dəyərində satınalma müqaviləsinin qalibi olub.

Bundan əvvəl, 2022-ci ildə isə “Sosial Xidmətlər Agentliyi” Publik Hüquqi Şəxsi ilə 6 milyon 422 min 706 manat dəyərində müqavilə bağlanıb.

Sərvanə Rəmixanova