Professorun startapı hüceyrələrin qocalmasına qarşı preparatı sınaqdan keçirəcək

Harvard Universitetinin genetika professoru Devid Sinklerin təsis etdiyi “Life Biosciences” şirkəti hüceyrələrin qocalmasını geri çevirməyə yönəlmiş ER-100 preparatının klinik sınaqları üçün ABŞ Qida və Dərman Administrasiyasından (FDA) icazə alıb.

Valyuta.az "TheTech"ə istinadən xəbər verir ki, ER-100 epigenetik yenidən proqramlaşdırma texnologiyasına əsaslanan və insanlar üzərində sınaqdan keçirilməsinə icazə verilən ilk preparatlardan biridir.

Texnologiyanın məqsədi hüceyrələrin DNT-sini dəyişdirmək deyil, onları daha gənc və sağlam funksional vəziyyətə qaytarmaqdır.

Preparatın ilk klinik sınaqları açıq bucaqlı qlaukoma və görmə sinirinin neyropatiyası olan pasiyentlər üzərində aparılır. Bu xəstəliklər zamanı zədələnmiş hüceyrələr bərpa olunmur və görmə itkisi əksər hallarda geri dönməz olur.

ER-100-ün əsasında duran texnologiya əvvəlcə siçanlar, daha sonra primatlar üzərində sınaqdan keçirilib. Araşdırmalar preparatın DNT strukturunu dəyişdirmədən hüceyrələrin fəaliyyətini bərpa etməyə kömək edə biləcəyini göstərib.

“Life Biosciences” 2026-cı ilin iyununda ilk pasiyentə preparatın tətbiq olunduğunu açıqlayıb. Hazırda sınaqların əsas məqsədi preparatın təhlükəsizliyini qiymətləndirməkdir.

Şirkət bu ilin aprelində 80 milyon ABŞ dolları həcmində investisiya cəlb edib. Vəsait klinik tədqiqatların genişləndirilməsinə və qocalma ilə əlaqəli digər xəstəliklər üçün yeni preparatların hazırlanmasına yönəldiləcək.

Mütəxəssislər hesab edirlər ki, layihənin uğurlu olması halında bu yanaşma gələcəkdə Alzheimer, Parkinson və digər yaşla bağlı xəstəliklərin müalicəsində yeni imkanlar aça bilər. Buna görə də ER-100 təkcə yeni dərman namizədi deyil, həm də qocalmanın bioloji səviyyədə idarə olunması istiqamətində mühüm elmi addım kimi qiymətləndirilir.

Mayya Hüseynova