Dünyanın ən yaxşı kompakt elektromobləri seçildi - TOP 10

Britaniyanın nüfuzlu “Autocar” nəşrinin mütəxəssisləri 2026-cı il üçün ən yaxşı kompakt elektromobili müəyyən ediblər. 

Valyuta.az xəbər verir ki, reytinqdə birinci yeri yeni “Renault 5 E-Tech” modeli tutub.

Ekspertlərin sözlərinə görə, avtomobil 1972-ci ilin məşhur “Renault 5” modelinin dizayn elementlərini müasir texnologiyalarla uğurla birləşdirir.

“Bizim fikrimizcə, hazırda əldə oluna bilən ən yaxşı kompakt elektromobil ‘Renault 5’dir. O, retro üslublu dizaynı, xoş idarəetməsi, yaxşı düşünülmüş salonu və əsas rəqiblərinin bir çoxundan daha münasib qiyməti ilə seçilir”, deyə “Autocar”ın qiymətləndirməsində qeyd olunur.

Hazırda Avropa bazarında “Renault 5 E-Tech” modelinin qiyməti versiya, batareya tutumu və komplektasiyadan asılı olaraq 23 min–36,4 min avro arasında dəyişir.

Ən yaxşı kompakt elektromobillər

Britaniyalı ekspertlər müxtəlif kateqoriyalar üzrə də qalibləri müəyyənləşdiriblər:

“Renault 5 E-Tech” — gündəlik istifadə üçün ən yaxşı seçim;
2. “Fiat Grande Panda Electric” — dizayna önəm verənlər üçün ən yaxşı seçim;
3. “MG 4 EV” — ən yaxşı yürüş ehtiyatı;
4. “Mini Cooper E” — ən yaxşı idarəetmə xüsusiyyətləri;
5. “Nissan Micra” — ən yüksək komfort və sürüş keyfiyyəti;
6. “Citroën ë-C3” — qiymət və keyfiyyət nisbətinə görə ən yaxşı seçim;
7. “Ford Puma Gen-E” — geniş salon axtaranlar üçün ən yaxşı variant;
8. “Hyundai Inster” — salon funksionallığı üzrə ən yaxşı model;
9. “Volkswagen ID.3” — məkan və komfort baxımından ən yaxşı seçim;
10. “BYD Dolphin Surf” — baza təchizatı səviyyəsinə görə ən yaxşı model.

Ekspertlər qeyd edirlər ki, kompakt elektromobillərə maraq Avropada sürətlə artır. Batareya texnologiyalarının inkişafı və dövlət təşviqləri sürücülərin elektrik nəqliyyatına keçidini sürətləndirir.

Paşa Məmmədli