Vençur fondlarının ən çox diqqətini çəkən 10 startap

Y Combinator-un (YC) 2026-cı ilin yaz proqramının "Demo Day" tədbirində təqdim olunan startaplar arasında süni intellekt, müdafiə texnologiyaları, robototexnika və proqram təminatı sahələrində fəaliyyət göstərən layihələr investorların diqqətini xüsusilə cəlb edib.

Valyuta.az xəbər verir ki, aşağıdakı startaplar tədbirin ən perspektivli iştirakçıları hesab olunur.

9 Mothers

Sahə: Süni intellektlə işləyən antidron sistemləri
"9 Mothers" kiçik pilotsuz uçuş aparatlarını aşkarlayıb məhv edə bilən daha əlçatan müdafiə sistemi hazırladığını bildirir. Şirkətin məlumatına görə, sistem saatda 96 kilometr sürətlə hərəkət edən dronları izləyə və zərərsizləşdirə bilir.
2024-cü ildə təsis edilən startap artıq 1,6 milyon dollarlıq satış həyata keçirib. Mövcud müqavilələrdən birinin ilin sonuna qədər 35 milyon dollara çatacağı gözlənilir. Şirkət gələcəkdə 1 milyard dollarlıq müqavilə portfeli formalaşdırmağı hədəfləyir. Məlumata görə, 9 Mothers-un qiymətləndirilməsi 200 milyon dolları ötüb.

Arga Labs

Sahə: AI agentləri üçün rəqəmsal test mühitləri
Arga Labs şirkətlərin proqram təminatlarının “rəqəmsal əkizlərini” yaradaraq AI agentlərinin kodları təhlükəsiz şəkildə sınaqdan keçirməsinə imkan verir. Məhsul proqram təminatının test prosesində yaranan vaxt və resurs problemlərini həll etməyi hədəfləyir.

Adialante

Sahə: Mobil MRT klinikaları
"Adialante" erkən xərçəng diaqnostikası üçün daşına bilən kompakt MRT cihazları hazırlayır. Şirkət bu cihazları klinikalara gətirərək hər müayinə üçün təxminən 250 dollar ödəniş almağı planlaşdırır. Məqsəd MRT müayinələrini yalnız xəstələr üçün deyil, hər il həyata keçirilən rutin yoxlamalara çevirməkdir.

Complir

Sahə: Məhsul uyğunluğu və tənzimləmə idarəetməsi
"Complir" beynəlxalq bazarlara məhsul ixrac edən şirkətlər üçün uyğunluq proseslərini avtomatlaşdırır. Platforma süni intellekt vasitəsilə qaydalardakı dəyişiklikləri izləyir, lazımi sənədləri hazırlayır və məhsul etiketlərini müxtəlif ölkələrin tələblərinə uyğunlaşdırır.

Dispatch

Sahə: Kosmosda istehsal olunan məhsulların Yerə daşınması
"Dispatch" kosmosda istehsal olunan dərman, yarımkeçirici və digər məhsulların Yerə təhlükəsiz qaytarılması üçün təkrar istifadə edilə bilən kapsullar hazırlayır. Şirkət hesab edir ki, kosmos istehsalı yaxın gələcəkdə böyük sənayeyə çevriləcək.

Lightsprint

Sahə: Kodsuz proqram təminatı inkişafı
"Lightsprint" qeyri-texniki əməkdaşların proqram təminatında dəyişikliklər etməsinə imkan yaradır. İstifadəçilər istədikləri yeniliyi təsvir edir, sistem isə AI vasitəsilə kodu hazırlayır. Son mərhələdə mühəndis kodu yoxlayaraq təsdiqləyir.

Ploy

Sahə: Avtomatlaşdırılmış marketinq və veb-sayt yaradılması
"Webflow"un həmtəsisçisi və keçmiş texniki direktoru Bryant Chou tərəfindən yaradılan "Ploy" süni intellekt vasitəsilə açılış səhifələri yaradır, marketinq mətnləri yazır və reklam kampaniyalarını işə salır.
Startap yaxın zamanda "First Round" və "Y Combinator"un rəhbərlik etdiyi 27 milyon dollarlıq investisiya raundunu bağladığını açıqlayıb.

Sazabi

Sahə: Proqram təminatı problemlərinin aşkarlanması və həlli
"Sazabi" proqram sistemlərində yaranan problemləri avtomatik aşkarlayır və onların həlli üçün kod təklif edir. Platforma Slack inteqrasiyası vasitəsilə komandalarla əlaqə saxlayır və bir kliklə düzəliş göndərməyə imkan verir.

Silmaril

Sahə: AI təhlükəsizlik infrastrukturu
"Silmaril" süni intellekt agentlərini “prompt injection” kimi hücumlardan qorumaq üçün hazırlanıb. Platforma yeni təhlükələri avtomatik aşkarlayır və müdafiə sistemlərini öz-özünə yeniləyir.

Superset

Sahə: AI kodlaşdırma agentlərinin idarə olunması

"Superset" proqramçılara eyni anda 100-dən çox AI kodlaşdırma agentini idarə etməyə imkan verir. Platforma "Claude", "Cursor" və digər agentlərlə işləyir və hər bir agent üçün ayrıca iş mühiti yaradır.

Yeni nəslin trendi: AI agentləri və müdafiə texnologiyaları

2026-cı ilin YC yaz proqramı göstərir ki, investorların diqqəti əsasən süni intellekt agentləri, müdafiə texnologiyaları, təhlükəsizlik infrastrukturu və avtomatlaşdırma həllərinə yönəlib. Bəzi startapların qiymətləndirilməsi artıq 175-200 milyon dollar səviyyəsinə çatıb ki, bu da Y Combinator tarixində rekord göstəricilərdən hesab olunur.

Qeyd edək ki, "Y Combinator" (YC) dünyanın ən nüfuzlu startap akseleratorlarından biridir və "Airbnb", "Stripe", "Reddit", "Dropbox" kimi texnologiya nəhənglərinin ilk investorlarından olub. Hər il yüzlərlə erkən mərhələli startapa maliyyə və mentor dəstəyi verən YC-nin "Demo Day" tədbirləri investorlar tərəfindən yaxından izlənilir.

Sərvanə Rəmixanova