"Oracle" səhmlərindəki artım Larri Ellisonun sərvətini 300 milyard dollara çatdırdı

"Oracle" şirkətinin həmtəsisçisi Larri Ellison şirkətin səhmlərinin son beş gündə 28 faiz bahalaşması fonunda dünyanın ən varlı insanları siyahısında yenidən ikinci pilləyə yüksəlib. 

Valyuta.az xəbər verir ki, bazarların çərşənbə axşamı bağlanışı zamanı Ellisonun sərvəti təxminən 296 milyard dollar qiymətləndirilib. Bununla da o, "Google"un həmtəsisçisi Larri Peyci geridə qoyub. Hazırda siyahıda onun önündə yalnız təxminən 826 milyard dollarlıq sərvətə malik İlon Mask qərarlaşır.

"Oracle" səhmləri bazar ertəsi 10 faizdən çox yüksəlsə də, çərşənbə axşamı 1,4 faiz geriləyib. Eyni zamanda, "Google"un ana şirkəti olan "Alphabet"in səhmləri son beş gündə 6 faiz ucuzlaşıb. Şirkətin süni intellekt infrastrukturunun maliyyələşdirilməsi üçün 80 milyard dollarlıq səhm satışı planını açıqlamasından sonra Larri Peyc və Sergey Brinin hər biri təxminən 10 milyard dollar itirib.

Ekspertlər bildirirlər ki, süni intellekt sahəsindəki investisiya yarışı texnologiya milyarderlərinin sərvətlərinə fərqli təsir göstərir. "Oracle" bu sahədəki yüksəlişdən faydalanarkən, böyük infrastruktur xərcləri "Alphabet" kimi şirkətlər üzərində təzyiq yaradır.

Qeyd edək ki, Larri Ellison 2025-ci ilin sentyabrında qısa müddət ərzində dünyanın ən varlı şəxsi tituluna da sahib olub.

Sərvanə Rəmixanova