"OpenAI" və "Microsoft"un maliyyə razılaşmasının detalları sızdırıldı

Sızdırılmış sənədlər "OpenAI"nin "Microsoft"la gəlir bölgüsü mexanizmini bir qədər də aydınlaşdırıb.

Valyuta.az xəbər verir ki, məlumata görə, 2024-cü ildə "OpenAI" "Microsoft"a 493,8 milyon dollar, 2025-ci ilin ilk üç rübündə isə 865,8 milyon dollar həcmində gəlir payı verib. Bu ödənişlərin, şirkətlər arasında daha əvvəl razılaşdırılan 20%-lik gəlir paylaşımı çərçivəsində həyata keçirildiyi güman olunur.

Eyni zamanda "Microsoft"un da Bing və Azure "OpenAI" xidmətindən əldə etdiyi gəlirin təxminən 20%-ni "OpenAI"yə geri ödədiyi bildirilir. Şirkətin Azure və Bing üzrə gəlirləri açıqlanmadığı üçün dəqiq rəqəmləri hesablamaq mümkün deyil.

Sızan məlumatlar OpenAI-nin sürətlə artan xərclərinə də işıq salır. Analizlərə görə, şirkətin “inference” - yəni, modellərin cavab yaratması üçün istifadə olunan hesablamalar üzrə xərcləri 2024-cü ildə 3,8 milyard dollar, 2025-ci ilin ilk doqquz ayında isə 8,65 milyard dollar olub. Bu isə "OpenAI"nin bəzən əldə etdiyi gəlirdən daha çox xərc çəkdiyini göstərir.

Mütəxəssislər hesab edirlər ki, dünyanın ən iri AI şirkətlərindən biri belə xərclərini tam qarşılaya bilmirsə, bu, süni intellekt sektorundakı yüksək qiymətləndirmələr və “AI balonu” haqda narahatlıqları daha da gücləndirə bilər.

Sərvanə Rəmixanova