"OpenAI" "DeepSeek"i süni intellekt texnologiyalarını oğurlamaqda ittiham edir

Amerikalı tərtibatçı "OpenAI" Çin startapı "DeepSeek"i "DeepSeek R1" modelinin hazırlanmasında onun texnologiyalarından qanunsuz istifadə etməkdə ittiham edib. 

Valyuta.az "Bloomberg"ə istinadən xəbər verir ki, bu barədə xəbərdarlıq ABŞ qanunvericilərinə göndərilib.

Söhbət “distillasiya” prosesindən gedir — yəni yeni süni intellekt sisteminin daha güclü modelin cavabları əsasında öyrədilməsi, faktiki olaraq onun bilik və imkanlarını mənimsəməsi. Şirkətin məlumatına görə, "DeepSeek" əməkdaşları giriş məhdudiyyətlərini aşaraq gizlədilmiş üçüncü tərəf marşrutlaşdırıcıları vasitəsilə cavablar əldə edib və daha sonra bunları proqram təminatı yolu ilə öz modellərini öyrətmək üçün istifadə ediblər.

"OpenAI" bildirir ki, bu, ABŞ-ın milli təhlükəsizliyi üçün risk yaradır. "DeepSeek" əldə edilən texnologiyaları yüksək riskli sahələrdə — məsələn, biologiya və ya kimyada — məhdudiyyətsiz istifadə edə bilər. Eyni zamanda, "OpenAI" baş verənlərin qarşısını almaqda çətinlik çəkdiyini vurğulayır.

ChatGPT tərtibatçılarının sözlərinə görə, bu cür praktikalar son dövrlərdə, xüsusilə də Çindən olan süni intellekt startapları arasında daha tez-tez müşahidə olunur. "Bloomberg" qeyd edir ki, "DeepSeek" və digər Çin dil modellərinə pulsuz giriş ABŞ süni intellekt şirkətləri üçün risk yaradır.

Xatırladaq ki, ötən il "DeepSeek" çatbotu 120-dən çox ölkədə ən populyar tətbiqə çevrilərək böyük səs-küy yaratmışdı. Tərtibatçıların sözlərinə görə, onun hazırlanmasına cəmi 6 milyon dollar xərclənib. Müqayisə üçün, "OpenAI" yalnız "Super Bowl" reklamına 14 milyon dollar sərf edib.

Yanvarın sonunda isə "Nvidia" şirkətinin "OpenAI" ilə 100 milyard dollarlıq rekord müqaviləni dondurduğu barədə məlumat yayılmışdı. Şirkətin baş direktoru Censen Huan və digər top-menecerlər ChatGPT tərtibatçılarının yanaşmasından narazı qalmışdılar.

Hazırda ChatGPT dünya çatbot bazarının 80%-dən çoxunu tutur. Ən yaxın rəqiblər isə "Perplexity" və "Google" şirkətinin süni intellekt xidmətləridir və birlikdə istifadəçilərin təxminən 15%-ni əhatə edirlər.

Paşa Məmmədli