"Ford"un elektrikli avtomobil kabusu: Rekord zərərdən sonra planlar dəyişdi

Avtomobil sənayesinin köklü adlarından olan "Ford" üçün 2025-ci il sözün əsl mənasında kabusla yadda qalıb. Şirkət ötən çərşənbə axşamı açıqladığı maliyyə göstəriciləri ilə 2008-ci il böhranından bəri ən böyük zərbə aldığını rəsmən elan edib.

Valyuta.az xəbər verir ki, ili 8,2 milyard dollar məbləğində nəhəng xalis zərərlə başa vuran şirkət son dörd ilin ən zəif rüblük nəticəsini göstərərək bazarları təəccübləndirib. Bu sarsıntının əsas səbəbkarı kimi isə şirkətin elektrikli avtomobil bölməsi göstərilir.

Elektrikli avtomobil xəyalları vergi maneəsinə ilişdi

"Ford"un yalnız elektrikli avtomobil əməliyyatlarından itkisi 4,8 milyard dollara çatıb. Sektorda baş verən bu böyük dəyişimin arxasında siyasi qərarlar dayanır. Tramp administrasiyasının Bayden dövründə qüvvəyə minmiş 7.500 dollarlıq federal vergi güzəştini ləğv etməsi satışların kəskin azalmasına səbəb olub. İstehlakçıların bu qərara reaksiyasını "Ford"un baş icraçı direktoru Cim Fərli belə ifadə edib: “Son sözü müştəri dedi, məsələ bundan ibarətdir”.

Şirkət yaranmış vəziyyət fonunda strategiyasını tam elektrikli modellərdən hibrid modellərə yönəltmək qərarı verib. Hətta əfsanəvi "F-150 Lightning" modelinin istehsalının dayandırılması kimi sərt addımlar da atılıb.

Hədəfdə münasib qiymət və avtonom sürüş var

"Ford" rəhbərliyi 2026-cı ildə də milyardlarla dollar zərər gözləyir. Şirkətin maliyyə baxımından tarazlıq nöqtəsinə yalnız 2029-cu ildə çatacağı proqnozlaşdırılır. Bəs vergi üstünlüyü olmadan müştərini necə geri qaytarmaq olar?

"Ford" və "GM" kimi nəhəng istehsalçılar strategiyalarını “əlçatanlıq” və “avtonom sürüş” üzərində qurmağa başlayıblar. "Ford" 2028-ci ildə bazara çıxarmağı planlaşdırdığı 30 min dollarlıq yeni modeli ilə "Tesla"nın ən ucuz variantlarını belə geridə qoymağı hədəfləyir. Bildirilir ki, bu avtomobil sürücünün yola baxmadan hərəkət etməsinə imkan verən inkişaf etmiş texnologiyalarla təchiz olunacaq.

Çinli rəqiblərlə mübarizə və yeni tərəfdaşlıqlar

ABŞ daxilində bazar daraldığı halda, qlobal miqyasda Çin istehsalçılarının təzyiqi artmaqda davam edir. Çin hökumətinin geniş subsidiyaları sayəsində "BYD" kimi markalar olduqca aşağı qiymətlərlə bazar payını sürətlə genişləndirir. Belə ki, ötən il "BYD" qlobal satışlarda ilk dəfə olaraq "Ford"u geridə qoymağa nail olub.

"Ford" isə bu güclü rəqiblə birbaşa rəqabət aparmaq əvəzinə əməkdaşlıq variantlarını nəzərdən keçirir. Məlumata görə, şirkət Çinli "Geely" ilə potensial tərəfdaşlıq imkanlarını müzakirə edir.

Siyasi dəyişiklik "Ford" üçün ümid yaradıb

Zərərlərin digər səbəbi isə gömrük rüsumları ilə bağlı gözlənilməz xərc artımlarıdır. Dekabr ayında qəbul edilən hüquqi dəyişikliklər nəticəsində "Ford"un vergi yükü ikiqat artaraq 2 milyard dollara çatıb.

Bununla belə, Cim Farli və komandası yeni ildən ümidlidir. Tramp administrasiyasının emissiya standartlarını yumşaltması daxiliyanma mühərrikləri sahəsində güclü təcrübəyə malik istehsalçıları müəyyən qədər rahatladıb. Ekoloji fəalların tənqidinə səbəb olan bu qərar avtomobil nəhəngləri üçün qarşıdakı dövrdə daha sabit mühit vəd edir.

Paşa Məmmədli