"Nvidia"nın DLSS 5 texnologiyası mübahisəyə səbəb oldu

"Nvidia"nın GTC 2026 tədbirində təqdim etdiyi DLSS 5 texnologiyası böyük mübahisələrə səbəb olub. Oyun dünyasından gələn tənqidlərdən sonra şirkətin baş direktoru Censen Huan ilk dəfə məsələ ilə bağlı açıqlama verib.

Valyuta.az xəbər verir ki, Huan dünən keçirilən GTC 2026 tədbirində səhnəyə çıxaraq yeni süni intellekt texnologiyalarını təqdim edib. Təqdimatda çoxsaylı yeniliklər olsa da, internetin diqqəti əsasən DLSS 5 texnologiyasına yönəlib.

Şirkət bu sistemi “2018-ci ildə real vaxtlı ray tracing texnologiyasının təqdimatından bəri kompüter qrafikasında ən böyük addım” kimi xarakterizə edib.

DLSS 5 personajları və mühiti AI ilə yeniləyir

"Nvidia" təqdimat zamanı DLSS 5-in işləmə prinsiplərini göstərən görüntülər paylaşıb. Sistem oyun daxilində personajları və mühiti real vaxtda süni intellekt vasitəsilə yenidən formalaşdırır.

Lakin nümayiş gözlənilən effekti yaratmayıb. Oyun tərtibatçıları və oyunçular sosial şəbəkələrdə texnologiyanı kəskin tənqid ediblər. Bir çox istifadəçi personajların görünüşünü “süni intellekt tərəfindən yaradılmış qeyri-təbii görüntülər” kimi qiymətləndirib.

Censen Huan: “Onlar tamamilə yanılır”

Tənqidlərdən sonra Censen Huan mətbuat üçün sual-cavab sessiyası keçirib. "Tom's Hardware" müəllifi Pol Alcorn DLSS 5 ilə bağlı iradları səsləndirib. Huanqın cavabı qəti olub: “Əvvəlcə bunu deyim, onlar tamamilə yanılır".

Huan bildirib ki, DLSS 5 oyun daxilində geometriyanı, teksturaları və digər qrafik məlumatları generativ süni intellektlə birləşdirir.

“Sənəd üzərində nəzarət tərtibatçıda qalır”

"Nvidia"ya görə, DLSS 5 tərtibatçıların nəzarətini əllərindən almır. Şirkət qeyd edir ki, generativ AI sistemi oyunun vizual üslubunu dəyişdirmir və tərtibatçılar süni intellektin necə işləyəcəyini özləri tənzimləyə bilirlər.

Huan bunu belə izah edib: “Bütün nəzarət birbaşa oyun tərtibatçısındadır. Bu, klassik generativ AI deyil. Məzmunun idarəsi tərtibatçının əlində olan bir sistemdir. Buna görə biz bunu "neural rendering" adlandırırıq".

DLSS 5 üçün böyük studiyalar hazırlanır

"Nvidia" DLSS 5 üçün bir çox oyun studiyası ilə əməkdaşlıq etdiyini açıqlayıb. Siyahıya aşağıdakı şirkətlər daxildir:

"Bethesda Softworks", "Capcom", "Hotta Studio", "NetEase", "NCSOFT", "S-GAME", "Tencent", "Ubisoft", "Warner Bros. Games".

Demolarda iki RTX 5090 istifadə olunub

"Nvidia"nın nümayiş etdirdiyi demolar yüksək güclü sistem üzərində işləyib. Şirkət DLSS 5 demosunda iki ədəd "Nvidia GeForce RTX 5090" qrafik kartından istifadə olunduğunu təsdiqləyib.

Kartlardan biri oyunu işə salıb, digəri isə yalnız DLSS 5 modelinin emalını həyata keçirib.

"Nvidia" bildirir ki, yekun versiyada tək qrafik kartı kifayət edəcək. Lakin real performans göstəriciləri və hansı avadanlıqların dəstəklənəcəyi hələ açıqlanmayıb.

Buraxılış tarixi payız aylarına planlaşdırılır

"Nvidia" DLSS 5 texnologiyasını bu ilin payızında təqdim etməyi planlaşdırır. Texnologiyanın oyunlara real təsiri və oyunçuların mövqeyinin dəyişib-dəyişməyəcəyi isə hələlik açıq sual olaraq qalır.

Paşa Məmmədli