Təsadüfən zəngin olan insanların inanılmaz hekayələri - SƏHƏR OXUSU

Zəngin olmaq çoxlarının arzusudur. Adətən bu yol illərlə zəhmət, risk və düzgün qərarlar tələb edir. Amma bəzən həyat tamam başqa ssenari yaza bilir. Məsələn, elə insanlar var ki, onlar  çox əziyyət çəkmədən milyonçuya çevrilə biliblər. Bəli,  dünya üzrə bu cür hekayələr kifayət qədərdir və onların ortaq cəhəti birdir: heç biri əvvəlcədən planlaşdırılmayıb.

Valyuta.az təsadüf nəticəsində varlanan insanların real həyat hekayələrini təqdim edir.

ABŞ-da bir kazino kampaniyası zamanı Kevin Lewis adlı şəxs 1 milyon dollarlıq uduşun qalibi elan edilir. Lakin sonradan məlum olur ki, səhv şəxs çağırılıb - eyni adda başqa biri də var. Maraqlısı isə odur ki, kazino rəhbərliyi hər iki şəxsin uduşu saxlamasına qərar verir. Beləliklə, bir səhv iki nəfəri eyni anda milyonçu edir.

Başqa bir hadisədə isə Glenda Blackwell ərinin lotereya həvəsinə qarşı çıxmaq istəyərkən özü bileti alır. Məqsədi “bunun boş şey olduğunu” sübut etmək idi. Amma nəticə tam əksinə olur - qadın 1 milyon dollar qazanır.

Bəzən isə zənginlik bir tapıntının arxasında gizlənir. Pensilvaniyada bir şəxs cəmi 4 dollara aldığı köhnə rəsmin arxasında ABŞ-ın Müstəqillik Bəyannaməsinin nadir nüsxəsini tapır. Sonradan bu sənəd 2,4 milyon dollara satılır.

Eyni dərəcədə maraqlı başqa bir hekayə isə idman dünyasından gəlir. 1998-ci ildə keçirilən beysbol oyununda tamaşaçı Philip Mazursky rekord qıran topu tutur və sonradan onu 3 milyon dollara satır. Bir anlıq refleks həyatını dəyişir.

Texnologiya sahəsində də təsadüfi zənginlik nümunələri var. 1990-cı illərdə Chris Clark cəmi 20 dollara “Pizza.com” domenini alır. O dövrdə bu qərar risk kimi görünürdü. Amma illər sonra həmin domen 2,6 milyon dollara satılır.

Ən maraqlı hekayələrdən biri isə "Google" ilə bağlıdır. Aşpaz Charlie Ayers yüksək maaşlı işini tərk edib daha az maaşlı, amma perspektivli bir startapda işləməyə qərar verir. Bu startap sonradan "Google" olur və "Ayers" şirkətdən ayrılarkən onun səhmlərinin dəyəri 26 milyon dollara çatır.

Antik əşyalar bazarında da belə sürprizlər olur. ABŞ-da bir metal tullantıları alverçisi aldığı köhnə əşyalar arasında Faberge imperiya yumurtası tapır. Sonradan məlum olur ki, bu əşya 30 milyon dollardan çox dəyərə malikdir.

Kaliforniyada yaşayan Teri Horton isə cəmi 5 dollara aldığı tablo ilə məşhurlaşır. Ekspertlər əsərin məşhur rəssam Jackson Pollock-a aid olduğunu təsdiqləyir və tablo üçün milyonlarla dollar təklif edilir.

Bəlkə də ən böyük hekayələrdən biri Rick Norsigian-a aiddir. O, qaraj satışından 45 dollara aldığı köhnə fotoların məşhur fotoqraf Ansel Adams-a aid olduğunu öyrənir. Bu kolleksiyanın ümumi dəyəri 200 milyon dollar olaraq qiymətləndirilir.

Sərvanə Rəmixanova