Qlobal məlumat həcmi 181 zettabayta çatır, kiber risklər və xərclər artır

Dünya üzrə saxlanılan məlumatların qlobal həcmi 181 zettabayta çatdığı üçün bu böyük trafik özü ilə əhəmiyyətli kiber risklər gətirir. 

Valyuta.az xəbər verir ki, məlumatların saniyədə 29 terabayt sürətlə axdığı bugünkü dünyada məlumat sızmalarının qlobal dəyəri orta hesabla 4,45 milyon dollara çatıb. Bu artım təşkilatları məlumatların saxlanması və təhlükəsizlik strategiyalarını yenidən qiymətləndirməyə sövq edir.

Bazar analizlərinə görə, dünya üzrə istehsal olunan saxlanılan məlumatların həcmi illik 23,13% artım göstərir. Hər gün təxminən 2,5 kentilyon bayt məlumat istehsal olunan ekosistemdə, bulud hesablama və süni intellekt kimi sahələr məlumat təhlükəsizliyinə güvənir. "TD SYNNEX" tərəfindən paylaşılan məlumatlar göstərir ki, hər 10 iş ortağından 8-i gələcəkdə monitorinq və fəlakət bərpası kimi idarə olunan xidmətlərə fokuslanacaq.

Məlumat itkilərinin maliyyəti artdıqca, klassik depolama metodlarının kifayət etmədiyi vurğulanır. 

"Veeam" tərəfindən yayımlanan hesabatlar da göstərir ki, müasir məlumat qoruma həllərinin əsas xüsusiyyəti kibertəhlükəsizlik vasitələri ilə inteqrasiyadır. İş ortaqlarının 82,5%-i fəlakət bərpası proseslərini idarəetmə xidmətlərinin mərkəzinə qoymağı planlaşdırır.

"TD SYNNEX" məlumat təhlükəsizliyini təmin etmək istəyən müəssisələr üçün texniki tövsiyələr təqdim edir:

3-2-1 qaydasını tətbiq edin: Məlumatıarın ən az 3 nüsxəsini yaradın, bunları 2 fərqli mühitdə saxlayın və bir nüsxəni fiziki olaraq fərqli bir yerdə qoruyun.

Müntəzəm yoxlamalar aparın: Depolama proseslərini avtomatlaşdırın və bu depoların bərpa oluna bildiyini dövri testlərlə yoxlayın.

Dəyişdirilə bilməyən sistemlərdən istifadə edin: Fidyə proqramlarının depo fayllara girişini əngəlləmək üçün şifrələnmiş və üzərinə yazıla bilməyən sistemləri seçin.

İnteqrasiya olunmuş təhlükəsizlik strukturu yaradın: Depolama planını giriş icazələri, güncəl təhlükəsizlik proqramları və işçi təlimlərini əhatə edən ümumi kibertəhlükəsizlik strategiyası ilə birləşdirin.

"TD SYNNEX" Türkiyə prezidenti Behçet Yumrukçallı qeyd edir ki, məlumat işin davamlılığı üçün həyati əhəmiyyət kəsb edir və həllər bir-birindən ayrıq deyil, inteqrasiya olunmuş ekosistem şəklində qurulmalıdır. Şirkət həm distribyutor fəaliyyətlərini, həm də ucdan-uca texnologiya dəstəyini təmin etməklə müəssisələrin risklərə qarşı hazırlığını gücləndirməyi hədəfləyir.

Paşa Məmmədli