İstifadəçilərin abunəliyi ləğv etməsini çətinləşdirən proseslərə görə 75 milyon dollar cərimə olundu

Proqram təminatı hazırlayan böyük texnologiya şirkəti “Adobe” istifadəçilərin abunəliyi ləğv etməsini çətinləşdirən proseslərə görə açılan kollektiv iddia üzrə razılığa gəlib. 

Valyuta.az xəbər verir ki, şirkət zərərçəkən istifadəçilərə kompensasiya məqsədilə 75 milyon dollar ödəməyi və əlavə xidmətlər təqdim etməyi qəbul edib.

İddialara görə, istifadəçilər aylıq ödənişli kimi təqdim olunan illik planlara qoşularkən erkən ləğv cərimələri barədə kifayət qədər məlumatlandırılmayıb. Abunəliyi dayandırmaq istəyən şəxslər isə gizli ödənişlər və mürəkkəb prosedurlarla qarşılaşıb.

Məhkəmə prosesində həmçinin qeyd olunub ki, abunəliyin ləğv edilməsi üçün seçimlər istifadəçi interfeysində çətin tapılır, müştəri xidmətlərinə çıxış isə uzun gözləmə vaxtları ilə müşayiət olunur. Bu da istifadəçilərin narazılığını daha da artırıb.

Razılaşmaya əsasən, “Adobe” yalnız maliyyə kompensasiyası ilə kifayətlənməyəcək, eyni zamanda təsirlənmiş istifadəçilərə ödənişsiz xidmətlər və əlavə istifadə müddəti təqdim edəcək.

Sərvanə Rəmixanova