“Qiymət soruşub gedən müştərini alıcıya çevirmək mümkündür” - Azad Qəhrəmanov

Satış sahəsində tez-tez belə bir vəziyyətlə qarşılaşırıq. Müştəri yaxınlaşır, məhsulun qiymətini soruşur, hətta bəyənir, amma sonda heç nə almadan çıxıb gedir. Bu, bir çox satıcının yaşadığı real vəziyyətdir. Maraqlanan çox olsa da, real alıcı az olur. Bəs bunun səbəbi nədir?

"SAT Group” şirkətinin həmtəsisçisi, satış təlimçisi Azad Qəhrəmanov Valyuta.az-a bildirdi ki, bu cür maraqlanan şəxslər əslində, potensial müştəridir: “Mağaza satışında buna ziyarətçi deyirlər. Alıb-almayacağı bəli deyil. İstənilən halda, onlara yaxşı xidmət göstərməliyik. Almasa belə, biz onun yadında işinə peşəkar yanaşan, səmimi xidmət göstərən məkan kimi qalmalıyıq. Bəzən bu cür müştərilərin maraqlanıb almaması bizi narahat edir. Ancaq anlamaq lazımdır ki, satışda statistika işləyir. Əgər mağazaya 50 nəfər gəlirsə, 20 nəfəri sadəcə baxıb gedir, 30-u maraqlanır, yalnız 5 nəfər real alıcı olur. Bir sahibkar onun üzərində işləməlidir ki, bu statistikanı yaxşılaşdırsın. Yekunda gündəlik alış edən 5 müştərini qaldırıb 10 etsin. Zamanla o statistikanı artırmaq olar. Amma yenə də, təbii ki, almayanlar olacaq”.

A.Qəhrəmanov deyir ki, burada sahibkarların diqqət etməli olduğu əsas nüanslar var: “Birincisi, elə bir mühit yaratmalıdır ki, mağazaya daxil olan, yaxud onlaynda yazan müştəri xoş ünsiyyət görməlidir. Digər nüans əməkdaşların inkişaf etdirmək lazımdır ki, potensial müştərini real alıcıya çevirməyi bacarmalıdır. Maraqlanan şəxslərin daha çoxuna satış edə bilsinlər. Müştərilərin ala biləcəyi məhsullar yaratmaq və ya hazırlamaq lazımdır ki, gələn adamlar özlərinə və ehtiyaclarına uyğun məhsul tapa bilsinlər. Bu məsələlərə diqqət yetirərək şirkət və ya sahibkar öz müştərilərinin sayını artıra və daha çox mənfəət əldə edə bilər”.

Şəbnəm İbrahimxəlilova