Dünyanın ən varlı idman klubu sahiblərinin ilk 10-luğu

Beynəlxalq biznesdə ən eksklüziv sahələrdən biri peşəkar idman klubuna sahib olmaqdır. Bu imkan adətən texnologiya, pərakəndə satış, lüks mallar və bankçılıq kimi sahələrdə böyük sərvət toplamış milyarderlər üçün əlçatan olur. Müxtəlif liqalarda franşiza dəyərlərinin artması ilə bir çox klubun arxasındakı maliyyə gücü də kəskin şəkildə yüksəlib.

Valyuta.az 2026-cı ildə dünyanın ən varlı idman klubu sahiblərinin ümumi sərvəti yüz milyardlarla dollarla ölçülür. “Forbes” nəşrinə görə siyahı aşağıdakı kimidir:

Bernar Arno

Sərvəti: 171 milyard dollar
Komanda: “Paris FC” (futbol)
Arno 2024-cü ildə ailə investisiya şirkəti vasitəsilə “Paris FC” klubunda nəzarət paketini aldıqdan sonra siyahıya başçılıq edir. Alış zamanı klubun dəyəri təxminən 100 milyon dollar idi ki, bu da onun ümumi sərvətinin kiçik bir hissəsini təşkil edirdi. “Paris Saint-Germain”in şəhərdə üstünlüyünə baxmayaraq, Arnonun komandaya böyük hədəfləri var və o, klubu Liqa 1-də güclü rəqibə çevirmək niyyətindədir.

Rob Uolton

Sərvəti: 146 milyard dollar
Komanda: “Denver Broncos” (amerika futbolu)
“Walmart”ın qurucusu Sem Uoltonun oğlu olan Uolton 2022-ci ildə NFL tarixinin ən bahalı klub satışlarından biri çərçivəsində “Broncos”u satın alıb. Bu alışdan sonra komanda daha rəqabətli olub və pley-off uğrunda əsas namizədlərdən birinə çevrilib. Məlumatlara görə, o, 2024-cü ildə “Arizona Diamondbacks” klubunda da azlıq payı əldə edərək idman portfelini genişləndirib.

Stiv Balmer

Sərvəti: 126 milyard dollar
Komanda: “Los Angeles Clippers” (basketbol)
“Microsoft”un keçmiş baş direktoru olan Balmer böyük sərvətini bu şirkətdə toplayıb. O, 2014-cü ildə “Clippers” klubunu 2 milyard dollara alıb. Həmin dövrdə bu məbləğ yüksək hesab edilsə də, NBA komandalarının dəyərinin artması ilə bu investisiya özünü doğruldub.

Miriam Adelson

Sərvəti: 37,5 milyard dollar
Komanda: “Dallas Mavericks” (basketbol)
Adelson mərhum həyat yoldaşı, kazino maqnatı Şeldon Adelsonun sərvətinin böyük hissəsini miras alıb. Hazırda o və kürəkəni Patrik Dyumon “Mavericks” klubuna rəhbərlik edir. 2025-ci ildə Luka Donçiçin mübahisəli transferindən sonra komanda çətin dövr yaşasa da, draftda birinci seçimlə Kuper Flaqın seçilməsi ümidləri yenidən artırıb.

İdan Ofer

Sərvəti: 34,6 milyard dollar
Komanda: “FC Famalicão”
Ofer qlobal gəmiçilik fəaliyyəti ilə məşğul olan “Eastern Pacific Shipping” şirkəti vasitəsilə sərvət qazanıb. O, “Quantum Pacific” investisiya şirkəti vasitəsilə Portuqaliyanın “Famalicão” klubunda əsas paya malikdir. Bundan əlavə, o, “Atlético Madrid” klubunda azlıq payı ilə Avropa futbolunda da təsir sahibidir.

Robert Pera

Sərvəti: 31,7 milyard dollar
Komanda: “Memphis Grizzlies” (basketbol)
Pera “Ubiquiti” şirkətinin sürətli inkişafı nəticəsində sərvətini əhəmiyyətli dərəcədə artırıb. Şirkətin gəlirlərinin artması onun varidatını son illərdə daha da yüksəldib. O, 2012-ci ildə “Grizzlies” klubunu alaraq NBA-nın ən gənc sahiblərindən biri olaraq qalır.

Henri Samueli

Sərvəti: 30,8 milyard dollar
Komanda: “Anaheim Ducks” (hokkey)
Samueli yarımkeçirici sənayesində fəaliyyət göstərən “Broadcom” şirkəti vasitəsilə sərvət əldə edib. O, 2005-ci ildə “Anaheim Ducks” klubunu aldıqdan sonra komandanın ev arenası olan “Honda Center”də, o cümlədən ətraf ərazidə milyardlarla dollarlıq yenidənqurma layihələrinə rəhbərlik edib.

Fransua Pino

Sərvəti: 29,5 milyard dollar
Komanda: “Stade Rennais” (futbol)
Pino “Gucci” və “Yves Saint Laurent” kimi brendləri özündə birləşdirən “Kering” şirkəti vasitəsilə sərvət qazanıb. O, uzun illərdir “Stade Rennais” klubunun sahibi və dəstəkçisidir. Klub həm gənc istedadların yetişdirilməsi, həm də Fransanın yüksək liqasında rəqabət qabiliyyəti ilə seçilir.

Den Gilbert

Sərvəti: 27,9 milyard dollar
Komanda: “Cleveland Cavaliers” (basketbol)
Gilbert 2005-ci ildən “Cavaliers” klubunun sahibidir və “Rocket Companies” adlı böyük ipoteka şirkətini qurub. Onun rəhbərliyi dövründə komanda 2016-cı ildə ilk NBA çempionluğunu qazanıb. Son illərdə isə yenidən pley-off mübarizəsinə qayıdıb.

Devid Tepper

Sərvəti: 23,7 milyard dollar
Komandalar: “Carolina Panthers”, “Charlotte FC” (futbol)
Tepper sərvətini “Appaloosa Management” hedc fondu vasitəsilə qazanıb. O, 2018-ci ildə “Panthers” klubunu aldıqdan sonra MLS çərçivəsində “Charlotte FC” klubunu yaradıb. “Panthers” bir neçə yenidənqurma mövsümündən sonra NFL pley-offuna qayıdaraq azarkeşlərə ümid verib.

Tənzilə Ağabalayeva