"Nvidia" süni intellekt çiplərindən 1 trilyon dollar gəlir gözləyir

"Nvidia" şirkətinin baş icraçı direktoru Censen Huan bildirib ki, şirkət 2027-ci ilə qədər qabaqcıl süni intellekt çipləri olan "Blackwell" və "Rubin" vasitəsilə ən azı 1 trilyon dollar gəlir əldə etməyi proqnozlaşdırır.

Valyuta.az xəbər verir ki, Huan şirkətin GPU Texnologiya Konfransında (GTC) çıxışı zamanı süni intellektin yaratdığı təsirin və artıq təqdim etdiyi dəyərin olduqca konkret olduğunu qeyd edib.

Son iki ildə “generativ süni intellekt” dövrünün başladığını xatırladan Huan bildirib ki, süni intellekt artıq yalnız müşahidə etmir, həm də orijinal məzmun yarada bilir: "Bu gün kod yazmaqla məşğul olan elə bir proqram mühəndisi yoxdur ki, bir və ya bir neçə süni intellekt agentinin dəstəyi olmadan işləsin".

Son iki ildə hesablama həcminə nəzər saldıqda, "Nvidia"nın qrafik emal vahidlərinə (GPU) olan tələbatın rekord səviyyəyə çatdığını deyən Huan “inanılmaz” miqdarda GPU göndərdiklərini və tələbatın artmaqda davam etdiyini vurğulayıb. Huan bildirib ki, süni intellektin düşünməsi, fəaliyyət göstərməsi, oxuması və məntiq yürütməsi üçün “çıxarım etməsi” vacibdir və son bir neçə ildə hesablama tələbi 1 milyon dəfə artıb.

O xatırladıb ki, ötən il "Blackwell" və "Rubin" çipləri üçün 2026-cı ilə qədər təxminən 500 milyard dollar həcmində tələbat proqnozlaşdırmışdı: "Hazırda isə 2027-ci ilə qədər ən azı 1 trilyon dollarlıq bazar görürəm. Hətta bu da kifayət etməyəcək, çünki hesablama tələbinin bundan xeyli yüksək olacağına əminəm".

Huan GTC çərçivəsində şirkətin yeni məhsulları və əməkdaşlıqları barədə də məlumat verib. O bildirib ki, "Nvidia"nın robot taksi platformasına daha dörd tərəfdaş qoşulub: "BYD, "Hyundai", "Nissan" və "Geely".

Huan qeyd edib ki, bu şirkətlər birlikdə ildə 18 milyon avtomobil istehsal edir və "Toyota" və "GM" kimi əvvəlki tərəfdaşlarla birlikdə gələcəkdə robot taksilərin sayını kəskin şəkildə artıracaqlar.

Şirkətin "Uber" ilə də əməkdaşlıq etdiyini açıqlayan Huan, robot taksilərin bir neçə şəhərdə platformanın şəbəkəsinə inteqrasiya ediləcəyini bildirib.

Bundan əlavə, Huan oyun qrafikasını Hollivud səviyyəli vizual effektlərə yaxınlaşdırmağı hədəfləyən yeni nəsil görüntü texnologiyası "DLSS 5", modul istinad arxitekturası "BlueField-4 STX" və açıq model tərtibatçıları ilə süni intellekt mütəxəssislərini birləşdirən qlobal əməkdaşlıq təşəbbüsü olan "NVIDIA Nemotron Koalisiyası"nı təqdim edib.

O vurğulayıb ki, bu koalisiya çərçivəsində "Black Forest Labs", "Cursor", "LangChain", "Mistral AI", "Perplexity", "Reflection AI", "Sarvam" və "Thinking Machines Lab" şirkətləri öz təcrübələrini birləşdirərək modellərin inkişafına töhfə verəcəklər.

Paşa Məmmədli