Peçenye ilə 1 milyard dollarlıq biznes

2017-ci ildə peçenye bişirməyi demək olar ki, bilməyən iki əmioğlu öz bizneslərini qurmağa qərar verdi. “Crumbl Cookies” şirkətinin qurucuları olan Ceyson Makqouen və Soyer Hemsli əvvəllər heç vaxt peçenye bişirməmişdilər. Amma onlar peçenyeni çox sevir və bu sevgini biznesə çevirmək istəyirdilər. Buna görə də ABŞ-ın Loqan şəhərində ilk “Crumbl Cookies” mağazasını açdılar.

Sadə bir ideya

Başlanğıcda “Crumbl” sadəcə əyləncəli bir ideya idi.

Ceyson Makqouen texnologiya sahəsində güclü idi və əvvəllər “Ancestry.com” kimi şirkətlərdə çalışmışdı. Soyer Hemsli isə universitetdə marketinq üzrə təhsil alırdı. Onlar birlikdə xüsusi bir şey yarada biləcəklərinə inanırdılar.

Onların əsas məqsədi çox sadə idi: dünyanın ən yaxşı şokoladlı peçenyəsini hazırlamaq.

Peçenye bişirmə təcrübələri olmasa da, onlar bu işi öyrənmək üçün çox çalışdılar. Mətbəxdə saatlarla müxtəlif reseptlər sınayır, dostlarından və ailə üzvlərindən peçenyelərin dadına baxmağı xahiş edirdilər. Nəhayət, çox bəyəndikləri bir resept tapdılar və bütün bizneslərini həmin resept üzərində qurmağa qərar verdilər.

Sosial media strategiyası

Amma yalnız dadlı peçenye hazırlamaq kifayət etmirdi. “Ceyson Makqouen” və “Soyer Hemsli” insanların diqqətini çəkməyin vacib olduğunu bilirdilər. Buna görə də sosial mediadan istifadə etməyə başladılar.

Onlar “TikTok” və “Instagram” kimi platformalarda peçenyelərin şəkil və videolarını paylaşmağa başladılar və bu paylaşımlar qısa zamanda böyük maraq topladı.

Həftəlik “Cookie Drop” ideyası

“Crumbl” brendini fərqləndirən əsas ideyalardan biri həftəlik “cookie drop” sistemi oldu.

Hər həftə “TikTok” vasitəsilə yeni və məhdud sayda peçenye dadı elan edilirdi. Bu dad yalnız həmin həftə satılırdı. Bu isə insanlarda həyəcan və gözlənti yaradırdı.

Bu strategiya həm də qıtlıq effekti yaradırdı: insanlar bilirdilər ki, yeni dad yalnız bir həftə mövcud olacaq.

Bir “Crumbl” peçenyesinin qiyməti adətən 4–5 dollar olur. Amma müştərilər 4, 6 və ya 12 ədədlik paket alanda hər peçenyenin qiyməti daha ucuz başa gəlir. Bu isə müştərilərə daha sərfəli seçim imkanı verir.

Müştərilərin və investorların diqqəti

Qısa müddət ərzində “Crumbl” böyük uğur qazandı. Sosial mediada milyonlarla izləyici topladı. “TikTok” platformasında şirkətin 7 milyondan çox izləyicisi var və “#TasteWeekly” adlı viral həştəqi geniş yayılıb.

İstifadəçilər “Crumbl”-un yeni peçenye dadlarını dadıb videolar paylaşır, rəylər bildirirlər — həm müsbət, həm də tənqidi. İnsanlar bu brendə böyük maraq göstərirdi. Təkcə müştərilər deyil, investorlar və sahibkarlar da şirkətə diqqət yetirməyə başladılar.

1 milyard dollarlıq satış

Bu gün “Crumbl Cookies” ABŞ-da 980-dən çox mağazaya sahibdir. Şirkətin qurucuları Ceyson Makqouen və Soyer Hemsli bildirirlər ki, bütün françayzilər üzrə satışlar artıq 1 milyard dolları keçib.

Təkcə 2022-ci ildə “Crumbl” 300 milyondan çox peçenye satıb.

Onlar heç vaxt kiçik peçenye bizneslərinin bu qədər böyük uğura çevriləcəyini düşünmürdülər. Amma bu gün hər satılan peçenyeyə və müştərilərinin üzündə yaratdıqları hər təbəssümə görə minnətdardırlar.

Şəbnəm İbrahimxəlilova