“zypl.ai” 5,5 milyon dollar investisiya alıb

Süni intellekt sahəsində fəaliyyət göstərən “zypl.ai” startapı 80 milyon dollar qiymətləndirmə ilə strateji bridge-raund çərçivəsində əlavə 5,5 milyon dollar investisiya cəlb edib.

Valyuta.az "The Tech"ə istinadən xəbər verir ki, investisiya “Carbide Ventures” fondu, eləcə də Şuxrat İbraqimov daxil olmaqla bir sıra biznes liderləri tərəfindən təmin olunub.

Maliyyə sektorunda qərarların qəbulunda sintetik məlumatların tətbiqi üzrə ixtisaslaşan şirkət bildirir ki, yeni investisiya mərhələsi onun inkişafında mühüm addımdır və platformaya, həmçinin beynəlxalq genişlənmə tempinə olan etimadı təsdiqləyir. Cəlb olunan vəsait əsas bazarlarda fəaliyyətin miqyasının artırılmasına və banklar üçün "zGAN" modeli əsasında sintetik məlumat həllərinin tətbiqinə yönəldiləcək.

“Carbide Ventures” fondunun baş tərəfdaşı Den Veyrix qeyd edib ki, fond bir il əvvəl “zypl.ai”yə ilk investisiyasını həyata keçirib və ötən 12 ay ərzində komandanın, məhsulun və artım tempinin yüksək səviyyəsini müşahidə edib. Onun sözlərinə görə, əlavə investisiya imkanı yaranan kimi bundan istifadə olunub və hazırda komanda ilə birlikdə yeni coğrafi bazarlara çıxış və əlavə gəlir mənbələrinin müəyyənləşdirilməsi istiqamətində iş aparılır.

“zypl.ai” nadir və qeyri-standart ssenariləri nəzərə alaraq sintetik məlumatların yaradılmasına yönəlmiş "zGAN" adlı generativ süni intellekt modelini hazırlayıb. Bu yanaşma makroiqtisadi qeyri-sabitlik şəraitində proqnoz modellərinin dəqiqliyini artırmağa imkan verir. Texnologiya ilə bağlı “arXiv” platformasında iki elmi məqalə dərc olunub və “NeurIPS” konfransında təqdim edilib.

"zGAN" sintetik məlumat generatoru “zypl.ai”-nin “Lucid” adlı no-code platformasına inteqrasiya olunub. Bu həll maliyyə təşkilatlarına süni intellekt modellərini müstəqil şəkildə hazırlamaq və tətbiq etmək imkanı yaradır. Hazırda şirkət dünyanın 20 ölkəsində 60-dan çox maliyyə təşkilatı ilə əməkdaşlıq edir. Startapın investorları arasında “Prosus Ventures” və digər fondlar da yer alır.

Mayya Hüseynova