İki qardaşın davası nəhəng brend yaratdı - SƏHƏR OXUSU

İdman dünyasında bəzən ən böyük rəqabətlər stadionlarda deyil, ailə daxilində başlayır. Bu dəfə söhbət təkcə biznesdən yox, eyni kökdən çıxan iki yolun necə bir-birinə rəqibə çevrilməsindən gedir. Bir vaxtlar eyni dam altında qurulan kiçik ayaqqabı istehsalı ideyası illər sonra dünya bazarını bölən iki nəhəng brendin yaranmasına səbəb oldu. Bu hekayə sadəcə uğurdan deyil,  ambisiya, fikir ayrılığı və tarixə düşən bir qardaş münaqişəsindən bəhs edir.

Valyuta.az xəbər verir ki, hər iki brendin əsası Almaniyanın Hersoqenaurax şəhərində yaşayan Dassler qardaşları - Adolf Dassler və Rudolf Dassler tərəfindən qoyulub. Onlar 1924-cü ildə analarının kiçik camaşırxanasında idman ayaqqabıları istehsalına başlayaraq “Dassler Qardaşları Ayaqqabı Fabriki”ni qurublar.

Şirkətin ilk böyük uğuru 1936-cı il Berlin Olimpiadasında əldə olunub. Amerikalı sprinter "Jesse Owens Dassler" ayaqqabıları ilə 4 qızıl medal qazanaraq brendin dünya miqyasında tanınmasına səbəb olub.

Lakin İkinci Dünya Müharibəsi dövründə qardaşlar arasında münasibətlər gərginləşib. Müharibədən sonra isə bu gərginlik daha da artaraq 1948-ci ildə şirkətin iki hissəyə bölünməsi ilə nəticələnib. Adolf Dassler öz şirkətini “Adidas” adlandırıb, Rudolf Dassler isə əvvəl “Ruda” kimi başladığı brendin adını sonradan “Puma”ya dəyişib.

Bu ayrılıq yalnız biznes sahəsində deyil, şəhərin sosial həyatında da təsirini göstərib. Hersoqenaurax faktiki olaraq iki düşərgəyə bölünüb - insanlar, mağazalar və işçilər belə Adidas və ya Puma tərəfdarı kimi ayrılıb.

Sonrakı illərdə hər iki brend sürətlə inkişaf edib. "Adidas" innovativ dizaynları ilə önə çıxaraq çıxarıla bilən mismarlı futbol butslarını təqdim edib və 1954-cü il Dünya Çempionatında Almaniya millisinin qələbəsində mühüm rol oynayıb. Puma isə yüksək performanslı ayaqqabıları ilə tanınıb və əfsanəvi futbolçu Pele kimi idmançılarla əməkdaşlıq edərək qlobal uğur qazanıb.

Bu gün hər iki şirkət milyardlarla dollar dəyərində qlobal nəhəngə çevrilib və idman, moda və həyat tərzi sahəsində lider mövqelərini qoruyur.

Qeyd olunur ki, "Adidas" və "Puma"nın yaranma hekayəsi təkcə biznes uğuru deyil, həm də ailə, ambisiya və rəqabətin dünya sənayesinə necə təsir etdiyini göstərən ən maraqlı nümunələrdən biridir.

Sərvanə Rəmixanova