500 000 ABŞ dolları investisiya alan startap

Biznes üçün HRM platforması hazırlayan “Verifix” startapı qısa müddətdə 500 000 ABŞ dolları investisiya cəlb edərək fandreyzinq prosesində sürətli qərarvermə, düzgün zamanlama və strateji yanaşmanın nə qədər vacib olduğunu nümayiş etdirib.

Valyuta.az "The Tech"ə istinadən xəbər verir ki, “Verifix”in baş icraçı direktoru Mumin Səlimov (Mumin Salimov) bildirir ki, startap 2019-cu ildə yaradılıb və bu gün pərakəndə ticarət və HoReCa sektorları üçün HRM həlləri təqdim edir.

İnvestisiya raundu 2025-ci ilin avqustunda bağlanıb. Danışıqlar may ayında başlayıb, ilk vəsait iyulda, qalan hissə isə avqustda cəlb olunub. Raundda “Aloqa Ventures”, “IT Park Ventures” və “SQB Ventures” iştirak edib.

Şirkət üçün əsas prioritet maksimal qiymətləndirmə deyil, investisiyanı sürətli cəlb etmək olub. Bu yanaşma həm inkişaf tempini artırıb, həm də bazarın etimadını gücləndirib. Vəsait mərhələli şəkildə toplanaraq 10-12 aylıq maliyyə ehtiyatı (runway) formalaşdırılıb.

Fandreyzinq prosesi zamanı komanda paralel olaraq məhsulun inkişafını dayandırmayıb. Bu, investorlarla danışıqlarda real nəticələr və irəliləyiş göstərmək baxımından üstünlük yaradıb.

Əsas dərslərdən biri hüquqi məsələlərə diqqət yetirməkdir. Komanda riskləri düzgün qiymətləndirmək üçün təcrübəli hüquqşünasla işləyib. Bununla yanaşı, investor seçimi zamanı yalnız maliyyə deyil, onların təcrübəsi və şəbəkəsi də nəzərə alınıb.

Həmçinin startap ilkin mərhələdə konkret niş bazara fokuslanaraq (pərakəndə və HoReCa) məhsulu daha dəqiq formalaşdırıb. Bu, həm satışları sürətləndirib, həm də investorlar üçün daha aydın dəyər təklifi yaradıb.

Həmtəsisçilər arasında dəyərlərin uyğunluğu və düzgün məsuliyyət bölgüsü vacib amil kimi vurğulanır. Güclü komanda və daxili koordinasiya fandreyzinq prosesində əlavə üstünlük yaradır.

Təsisçilərə tövsiyə olunur ki, investorlarla əlaqələri əvvəlcədən qurmağa başlasınlar, mütəmadi olaraq nəticələri paylaşsınlar və növbəti investisiya raunduna hazırlığa ən azı 6 ay əvvəl start versinlər.

Mayya Hüseynova