Çin bazarında "Nvidia" dominantlığı: Məhdudiyyətlər yumşaldıldı, sifarişlər artdı

"Nvidia"nın diqqəti yenidən Çin bazarına yönəlib. Şirkətin baş direktoru Censen Huan bir müddətdir “köhnəlmiş” model kimi qiymətləndirilən "H200" qrafik prosessorlarının Çindən gələn yüksək tələbat səbəbilə yenidən istehsala qaytarıldığını açıqlayıb.

Valyuta.az xəbər verir ki, GTC tədbiri çərçivəsində jurnalistlərlə görüşən Huanın sözlərinə görə, çoxsaylı çinli müştərilərdən sifarişlər alınıb və tədarük zənciri tərəfdaşlarına istehsalın yenidən başlanması üçün çağırış edilib. Bu addım, qısa müddət əvvələ qədər Çin bazarından gəlir gözləməyən şirkət üçün kəskin dönüş hesab olunur.

Bu prosesin arxasında mürəkkəb siyasi amillər dayanır. Ötən ilin sonlarında ABŞ administrasiyası yüksək performanslı süni intellekt sürətləndiricilərinə tətbiq olunan ixrac məhdudiyyətlərini qismən yumşaltmaq qərarı verib. Bu dəyişiklik "Nvidia"nın "H200" modelini Çin müştərilərinə satmasına imkan yaradıb.

"H200" modeli şirkətin ən yeni məhsulları ilə müqayisədə bir qədər geri qalsa da, Çinli yerli istehsalçıların çiplərindən hələ də daha güclü hesab olunur. Pekin rəhbərliyinin də yerli alıcılara təzyiqi azaltması ilə "Hopper" arxitekturasına malik bu çiplərin istehsalı "Nvidia" üçün yenidən sərfəli olub.

Censen Huan qeyd edib ki, cəmi bir neçə həftə əvvəlki vəziyyətlə müqayisədə şərtlər tamamilə dəyişib. Onun sözlərinə görə, ABŞ rəhbərliyinin əsas məqsədi ölkənin qabaqcıl texnologiyalara çıxışda liderliyini qorumaqla yanaşı, bu böyük bazarı rəqiblərə itirməməkdir.

Bu yanaşma "Nvidia"ya həm milli təhlükəsizlik tələblərini nəzərə almağa, həm də qlobal rəqabət qabiliyyətini qorumağa imkan verir.

Şirkət rəhbərinin son açıqlamaları Pekinin yerli alıcılar üzərindəki təzyiqləri azaltdığını da göstərir. Bu dəyişiklik "Nvidia"nın maliyyə gözləntilərinə birbaşa təsir edir və texnologiya sektorunda balansların nə qədər sürətlə dəyişə bildiyini bir daha nümayiş etdirir.

"Nvidia" bir tərəfdən ən yeni texnologiyalarını Qərb bazarı üçün inkişaf etdirir, digər tərəfdən isə "H200" kimi özünü sübut etmiş məhsullarla Çin bazarındakı mövqeyini qorumaqda qərarlıdır.

Paşa Məmmədli